Агентии омори Тоҷикистон даъво кардааст, ки пандемии ҷаҳонии вируси коруна дар Тоҷикистон ба шумораи ҷойҳои нави корӣ таъсир нарасонда, баръакс беш аз 24,6 ҳазор ҷойҳои нави корӣ таъсис дода шудаанд. Таъсири вирус танҳо ба арзиши хидматрасонии кормандон дар бозори дохилӣ мушоҳида шудааст.
Аз аввали соли ҷорӣ дар Тоҷикистон корхонаю ташкилотҳои мухталиф тавонистаанд бо таъсиси ҷойҳои нави корӣ шумори бекорон дар Тоҷикистонро қариб 1% коҳиш диҳанд. Тибқи маълумоти Агентии омор, беш аз 15 ҳазору 700 ҷойи кор ё 64 дар сади тамоми ҷойҳои нави корӣ барои одамон доимӣ мебошанд.
Афзоиши ҷойҳои корӣ бо ин тамом намешавад. Агентӣ хабар медиҳад боз 3 ҳазору 700 ҷойҳои корӣ барқарор карда шуданд. Дар маҷмӯъ, аз оғози сол дар мақомоти меҳнат ва шуғли аҳолии Тоҷикистон беш аз 75 ҳазор нафар сабти ном шудааст. Тибқи маълумоти Агентии омор, ин нишондиҳанда, нисбат ба як соли пеш 3,2 дар сад камтар аст.
Тоҷикистон шояд ягона кишвар дар ҷаҳон аст, ки дар замони шуйӯъи вируси коруно аз афзоиши ҷои корӣ, яъне рушди иқтисод хабар медиҳад. Дар ҳоле, ки иқтисоди ҷаҳонӣ вориди бӯҳрони бесобиқа шуда, бархе аз кишварҳо, аз ҷумла Амрико дар семоҳаи дуввум сеяки ММД-и худро аз даст додаанд. Тибқи ҳисоби таҳлилгарони Бонки ҷаҳонӣ, маҷмӯъаи маҳсулоти дохилӣ дар ҷаҳон имсол аз 5 то 7 дарсад коҳиш хоҳад ёфт. Ин нишондиҳанда барои Амрико тибқи ҳисобҳо 9,5% солона баробар хоҳад буд.
Русия соли ҷорӣ 9-10 дарсади ММД ва Украина, ки камтар аз ҳама бо вирус дастбагиребон шудааст ҳудуди 5 дарсади онро аз даст хоҳад дод. Ҳеҷ кишваре то ҳол ҷуз Тоҷикистон аз рушди иқтисод хабар надодааст.
Як латифа дар шабакаҳои иҷтимоӣ ҳам пайдо шудааст, ки аз коруно дар бораи кишварҳои иқтисоди ҷаҳонӣ мепурсанд. Коруно посух медиҳад, ки иқтисоди ин кишварро фалон фоиз суқут додам, он кишвари дигарро фалон фоизи дигар. Вақте ба Тоҷикистон мерасад, посух медиҳад, ки “ман иқтисоди Тоҷикистонро пайдо накардам”.