Қимати қарордод ояндаи гази табиӣ бо сари расиди январу феврали 2023 дар ҷараёни муомилоти субҳи рӯзи чаҳоршанбеи бозори байналмилалии Нидерланд, ба камтар аз 80 евро дар ҳар мегаватт соат (100 метри кубӣ) расид, ки ба маънои бозгашт қимати газ ба сатҳи он дар рӯзҳои пеш аз 24 феврал ва оғози таҳоҷуми низомии Русия ба хоки Укроин аст.
Баҳои газ дар ҳар мегаватт соат авохири тобистони гузашта ва бо идомаи коҳиши тадриҷии содироти гази Русия ба Аврупо ба авҷи 300 евро расид аммо сипас раванди поёнравии он оғоз шуд.
Дар воқеъ, аз замоне, ки Владимир Путин, раисҷумҳури Русия, тасмим гирифт арзаи газ дар бозори Аврупоро аз тариқи хатти лӯлаи Нордстрим-1 мутаваққиф кунад, яъне аз авохири августи гузашта, бар хилофи интизориҳо қимати газ дар Аврупо дар маҷмӯъ раванди поёнравӣ ба худ гирифт.
Қимати гази табиӣ миёнаи моҳи ҷорӣ ба 130 евро коҳиш ёфт ва дар миёнаи ҳафтаи гузашта низ ба марзи 100 евро бозгашт. Ин нарх субҳи рӯзи чаҳоршанбе барои қарордодҳое барои январ то 77.350 евро ва барои қарордодҳои барои феврал то 79.645 евро поин омад.
Коршиносон ёдоварӣ карданд, ки оғози таъсиргузории коҳиши қимати газ дар миёни масрафкунандагони хонагӣ ва санъатии Аврупо то феврал тӯл хоҳад кашид зеро гази масрафии ду моҳи оянда пештар бо қиматҳои болотар харидорӣ шудааст.
Албатта пеш аз ин, қимати умдаи фурӯшии гази табиӣ дар муомилоти рӯзи 24 октябри бозори Нидерланд ба муддати як соат манфӣ шуда буд. Яъне таъминкунандагони газ ба далели шакл гирифтани сафи тӯлонии маҳмулаҳои газӣ, ки ҳаҷми онҳо бештар аз тавони захирасозии онҳо буд, ҳозир буданд, ҳудуди 16 евро ба ҳар касе, ки метавонист як мегаватт соат газро таҳвил бигирад, пардохт кунанд.