Паймони Миллии Тоҷикистон, эътилофи мухолифини тоҷик дар хориҷ бо пахши изҳороте боздошти мунаққид ва нависандаи тавонои тоҷик Абдуқодири Рустамро маҳкум карда, онро дастдарозӣ ба маънавиёт ва фазои адабии миллат номид.
ПМТ бар ин назар аст, ки “баъд аз боздошти сиёсатмадорон, рӯзноманигорон ва ҳомиёни ҳуқуқ дар гузашта аз ҷониби мақомоти Тоҷикистон, ҳоло низоми худкома мехоҳад фазои адабии кишварро низ зери сензураи шадид қарор дода бо ин роҳ заминаи мағзшӯии мардуми Тоҷикистонро фароҳам орад”.
Эътилофи мухолифин аз миллат ва аҳли адаби ҳавзаи забони форсӣ(тоҷикӣ) хостааст, “то дар ин қазия худро канор нагиранд ва барои барқарории адолат садо баланд кунанд”. То “тақдири одамушуаро сардафтари адабиёти классикии форсу-тоҷик Абӯабдуллоҳ Рӯдакӣ ба ворисаш ва панҷрудии замони мо, Абдуқодири Рустам такрор шавад”.
Матни изҳороти Паймони Миллии Тоҷикистон оиди боздошти нависанда ва озодандеши тоҷик Абдуқодири Рустам ба шакли зер аст:
Бино ба хабарҳои расонаҳои дохилӣ ва хориҷӣ нависанда ва озодандеши тоҷик Абдуқодири Рустам шоми 31 август аз ҷониби кормандони мақомоти тафтишотии Прокуратураи Генералии Тоҷикистон дар ҷои кораш беморхонаи «Ибни Сино» боздошт шудааст.
Аз рӯи маълумотҳои рӯи даст буда боздошти Абдуқодири Рустам рабт дорад ба боздошти роҳбар ва муассиси ин беморхона Абдухалил Холиқзод, ки баъд аз нашри китобаш «Ҳаводиси рӯзгори ман» ба вуқуъ пайваст.
Абдуқодири Рустам муҳаррири ин китоб мебошад.
Абдуқодири Рустам 65 сол дошта зодаи деҳаи Панҷруди Панҷакент аст. Ӯ соҳиби ду роман ва чандин достонҳои дигар низ ҳаст.
Паймони Миллии Тоҷикистон боздошти намояндаи барҷаста ва равшанфикри адабиёти муосири тоҷик Абдуқодири Рустамро аз ҷониби мақомоти интизомӣ маҳкум мекунад ва ин амалро дастдарозӣ ба маънавиёт ва фазои адабии миллат меҳисобад.
Мо бар ин назарем, ки баъд аз боздошти сиёсатмадорон, рӯзноманигорон ва ҳомиёни ҳуқуқ дар гузашта аз ҷониби мақомоти Тоҷикистон, ҳоло низоми худкома мехоҳад фазои адабии кишварро низ зери сензураи шадид қарор дода бо ин роҳ заминаи мағзшӯии мардуми Тоҷикистонро фароҳам орад.
Паймони Миллии Тоҷикистон ба ҳамаи миллати тоҷик ва алалхусус аҳли адаби ҳавзаи забони форсӣ(тоҷикӣ) муроҷиат карда, даъват мекунад, то дар ин қазия худро канор нагиранд ва барои барқарории адолат садо баланд кунанд.
Нагузорем, ки тақдири одамушуаро сардафтари адабиёти классикии форсу-тоҷик Абӯабдуллоҳ Рӯдакӣ ба ворисаш ва панҷрудии замони мо, Абдуқодири Рустам такрор шавад.
Набояд доғи сиёҳи дигаре дар таърих барои насли оянда бимонад.
Паймони Миллии Тоҷикистон
2 сентябри соли 2023