Рӯзи 20 декабр писари Шералӣ Гул, вазири собиқи энергетика ва саноати Тоҷикистон дар маркази шаҳри Душанбе бо мошини “Порше”, рақами давлатиаш TJ 00 10 AA 01, ду нафарро зер карда, аз ҷои ҳодиса фирор кардааст. Ҷабрдидаҳо дар ҳолати вазнин дар бемористон қарор доранд.
Дар ин бора бо истинод ба манбаъаш сомонаи “Ахбор” хабар додааст. Рақами давлатии мошине, ки ин ду нафарро зер кардааст, TJ 00 10 AA 01 будааст. Ин рақам ба истилоҳи роиҷ дар байни мардум, хеле «крутой» дониста мешавад.
Манбаи “Ахбор” гуфтааст, ин мошин ба Алишер Гулов, писари вазири собиқи энергетика ва саноати Тоҷикистон Шералӣ Гул тааллуқ дорад. Исми Алишер Гулов моҳи ноябр дар робита ба як занозанӣ бо ситораҳои маъруфи эстрада дар яке аз клубҳои шабонаи Душанбе расонаӣ шуда буд.
Яке аз писарони Шералӣ Гул – Ашраф Гулов домоди раисҷумҳур аст, ки қаблан чун консули Тоҷикистон дар Маскав фаъолият мекард.
Мақомоти расмии Тоҷикистон, аз ҷумла вазорати дохила, то кунун хабари садама бо мошини “Порше” дар маркази Душанберо шарҳ надодаанд.
Бори аввал нест, ки фарзандони мансабдорони баландпоя бо мошинҳои гаронарзишашон пиёдагардонро пахш мекунанд. Қаблан писарони Амонулло Ҳукумов, раҳбари собиқи Роҳи оҳани Тоҷикистон ва Давлаталӣ Саидов, мушовири раисҷумҳур ҳам дар ин кор “саҳм” гирифта буданд.
Дар аксари ҳолат фарзандони мансабдорон бе ҷазо мемонанд. Расул, писари Амонулло Ҳукумов ба пардохти 120 сомонӣ ҷарима маҳкум шуда, Фаромуз, писари Давлаталӣ Саидов бегуноҳ эълон шуда буд.