Вазорати хазонадории Амрико дар ҳоле рӯзи сешанбе даври ҷадиди таҳримҳои ин кишвар алайҳи Русияро эълом кард, ки номи Алина Кабаева, дӯстдухтари эҳтимолии Владимир Путин, раисҷумҳури Русия низ дар феҳристи таҳримшудагон дида мешавад.
Аз Алина Кабаева, қаҳрамони пешини олимпӣ дар риштаи гимностик дар гузориши расонаҳо ба унвони шарики зиндагии Владимир Путин ёд шудааст. Вазорати хазонадории Иёлоти муттаҳида эълом карда, ки эътибори визои Алина Кабаеваро ба ҳолати таълиқ даровардааст. Давлати Амрико ҳамчунин маҳдудиятҳое барои ин шаҳрванди 39 солаи Русия дар заминаи моликият дар назар гирифтааст.
Бино ба эъломи вазорати хазонадории Амрико Алина Кабаева дар раъси як ширкати расонаии рус фаъолият мекунад, ки дар ҳоли таблиғ дар дифоъ аз таҳоҷуми низомӣ ба Укроин аст.
Алексей Навлоний, мухолифи саршиноси Владимир Путин пеш аз ин бо интиқод аз фаъолиятҳои ширкати расонаии Алина Кабаева аз кишварҳои ғарбӣ хоста буд ӯро таҳрим кунанд.
Алина Кабаева собиқаи узвият дар Думаи Русияро низ дорад. Бритониё ва Иттиҳодияи Аврупо пеш аз ин ба тартиб тайи моҳҳои май ва июн таҳримҳоеро алайҳи ӯ вазъ карда буданд.
Дар феҳристи таҳримшудагони вазорати хазонадории Амрико номи Андрей Гурев, олигархи саршиноси рус низ дида мешавад. Ин марди сарватманди рус соҳиби дувумин хонаи бузурги Лондон пас аз Кохи Бокингҳом аст. Вилои ӯ дар Лондон 25 утоқи хоб дорад.
Амрико пеш аз ин дар моҳи апрел номҳои Катерина Тихонова ва Мария Воронтсова, ду духтари Владимир Путинро дар феҳристи таҳримшудагон қарор дода буд.