Пас аз болоравии қимати гандум дар моҳи ноябр, инак вобаста ба вазъи кунунии Укроин нархи гандум дар ҷаҳон боз ҳам боло меравад. Ин ба афзоиши танишҳо дар Украина ва Русия марбут аст, ки метавонад боиси мутаваққиф шудани содироти ғалла аз ду ширкати бузурги интиқолдиҳанда гардад.
Хабаргузории Bloomberg дар ин бора гузориш додааст.
Ҳафтаи муҳими танишҳо бар сари амалиёти низомии Русия дар наздикии Украина фаро расид. ИМА аз ҳамлаи эҳтимолӣ ҳушдор дод. Владимир Путин, раиси ҷумҳури Русия, Амрикоро ба иҷро накардани талаботи ӯ муттаҳам кард.
Фьючерсҳои гандуми Чикаго пас аз болоравии 5,3 дарсад дар ҳафтаи гузашта 1,7 дарсад афзоиш ёфт. Моҳи ноябр нархи ғалла ба баландтарин сатҳи худ аз соли 2012 расид. Нархи ҳозира назар ба он вақт 7% арзонтар аст.
Борҳое, ки аз минтақаи Баҳри Сиёҳ содир мешаванд, калиди таъмини амнияти захираҳои ҷаҳонии ғалла мебошад. Тақрибан сеяки содироти гандуму ҷав ва панҷяки тиҷорати ҷуворимакка ба Русия ва Украина рост меояд.
Нооромиҳои тӯлонӣ дар минтақа метавонад нархи ин қабил маводро гарон нигоҳ дорад ва қимати маводи ғизоиро дар даҳ соли охир ба баландтарин сатҳи худ расонад.
Бар асари ташаннуҷ дар Украина қимати ҷуворимакка ва лӯбиё низ боло рафтааст. Ҳавои гарм ва хушк дар Амрикои Ҷанубӣ нигарониҳо дар бораи зироатҳоро ба вуҷуд овардааст.