Ба дунёи ҷавонони тиллоии Тоҷикистон хуш омадед! Кишваре, ки раҳбарияташ дасти гадоӣ дар пеш, бо ёфтани камтарин фурсат аз кишварҳои дигар кӯмак мепурсад. Дар ҳамин ҳол қариб ҳамаи ҷавонони тиллоии Тоҷикистон наздикони раисҷумҳур ҳастанд.
Агар қаблан сухан аз фарзандони раисҷумҳур мерафт, инак набераҳояш ба саҳна омадаанд.
Мошинҳои тезгард, аспсаворӣ, истироҳат дар сафарии Дубай — қисме аз хушгузарониҳои набераи калонии раисҷумҳур Исмоил Соҳибов аст, ки аксу наворҳояшро дар шабакаҳои иҷтимоӣ пахш мекунад. Исмоил фарзанди духтари раисҷумҳур Фирӯза ва Маҳмадзоир Соҳибов аст.
Ин набераи Эмомалӣ Раҳмон хатмкардаи факултаи иқтисодии ДМТ буда, дар Бонки Миллӣ кор мекунад. Яъне бонкдори навбатӣ аз оилаи раисҷумҳур. Ӯро дар хушгузарониҳояш писари ноиби раиси Кумитаи давлатии амнияти миллӣ Мансур Умаров — Нодир ҳамроҳӣ мекунад.