Бо гузашти беш аз 20 соат аз садамаи чархбол дар Бадахшон, Кумитаи ҳолатҳои фавқулодаи Тоҷикистон то ҳол ба онҷо нарасидааст ва ҳеҷ хабаре аз мусофирону сарнишинони он нест.
Сабаби нарасидани КҲФ то ҷои ҳодиса ҳам бисёр сода аст — ин ниҳод чархбол надорад. Ягон дона.
Дар ҳоле, ки дар Точикистон тибқи гузориши худи КҲФ наздик ба сесад мавзеъи барои зиндагӣ хатарнок мавҷуд аст ва дар он ҳудуди 100 ҳазор нафар зиндагӣ мекунанд, давлати Тоҷикистон барои харидории як чархбол пул надорад.
Ҳар сол аз ҳаводиси табиъӣ даҳҳо нафар ҳалок мешаванд ва кишвар 400-500 миллион доллар зарар мебинад. Соли гузашта дар шоҳроҳи Душанбе Хуҷанд 17 нафар зери тарма ҳалок шуданд. Сабаби марги аксари онҳо зуд ба ҷои ҳодиса нарасидани наҷотдиҳандагон буд. Ва сабаби сари вақт нарасидани онҳо, бале, набудани чархбол аст.
КҲФ мегӯяд борҳо ба Вазорати дифоъ ва ҳукумат барои хариди чархбол муроҷиат кардааст, вале посух ҳамеша якест: пул нест.
Як чархболи наҷотдиҳандаи пурра муҷаҳҳазшуда бо таҷҳизоти замонавӣ ҳудуди 12 миллион доллар қимат дорад. Чархболи истифодашударо аз кишварҳои аврупоӣ ё Халиҷи Форс метавон бо қимати 3-4 миллион доллар дарёфт кард.
Ҳукумат дар ҳоле барои харидани як чархбол, ки метавонад ҷони садҳо нафарро наҷот диҳад, пул надорад, ки ба маблағи наздик 1 миллиард доллар иншооти нолозим аз қабили маҷмаъаи парлумонӣ, театри миллӣ, бинои Хадамоти алоқа, қасри нав барои ҳукумат дар Варзоб ва ғайра месозад.
Масалан бо маблағи сохтмони бинои нави парлумон барои вакилоне, ки вуҷудашон эҳсос намешавад, мешавад беш аз бист чархболи нав харид.