Бонки миллии Тоҷикистон бо нашри як иттилоия шахсони ҳуқуқӣ, соҳибкорони инфиродӣ ва хоҷагиҳои деҳқониро огоҳ кардааст, ки барои роҳандозии пардохтҳои ғайринақдии хизматрасониҳои давлатӣ аз суратҳисоби бонкӣ истифода намоянд.
БМТ таъкид карда, ки соҳибкорону ширкатҳо барои ин раванд бояд омода шаванд.
«Дар сурати надоштани суратҳисоби бонкӣ онҳо метавонанд, ба дилхоҳ ташкилоти қарзии молиявӣ муроҷиат намуда, суратҳисоби бонкӣ кушоянд», — омадааст дар иттилоия.
Ин ниҳод тавзеҳ додааст, ки барои роҳандозии пардохти хизматрасониҳои пулакии давлатӣ шахсони воқеӣ — аҳолӣ метавонанд аз кортҳои пардохтии бонкӣ, ҳамёнҳои электронӣ, барномаҳои мобилӣ ва Интернет- бонкинг, POS терминалҳо ва QR-рамзҳо истифода намоянд.
“Ба гурӯҳи хизматрасониҳои пулакии давлатӣ пардохти андозҳо, боҷҳои давлатӣ барои додани иҷозат ва иҷозатномаҳо, пардохтҳои дигари ҳатмӣ ба буҷет, ҷаримаҳо, маблағи суғуртаи ҳатмии давлатӣ, хизматрасониҳои тиббӣ, хизматрасониҳои коммуналӣ ва намудҳои дигари хизматрасониҳои давлатӣ дохил мешаванд”, омадааст дар иттилоия.
Бонки миллии Тоҷикистон зикр намудааст, ки бо фармони раисҷумҳур дар кишвар ҳисоббаробаркунии ғайринақдӣ вусъат дода мешаванд.
Аз ҷумла таъкид гардид, ки аз 1 августи соли 2023 пардохти тамоми хизматрасониҳои муздноки давлатӣ тариқи ғайринақдӣ амалӣ карда мешаванд.