Сафири Тоҷикистон дар Русия Имомуддин Сатторов сабаби дидору гуфтугӯ бо сардори Сарраёсати Вазорати корҳои дохилии Русия оид ба масъалаҳои муҳоҷират Валентина Казаковаро ба хабаргузории Спутник шарҳ додааст.
Хабаргузорӣ менависад, дар ин дидор дурнамои рушди ҳамкориҳои дуҷонибаи Тоҷикистон ва Русия вобаста ба масоили танзими ҳуқуқии иқомати шаҳрвандони Тоҷикистон, хусусан муҳоҷирони меҳнатӣ, дар ҳудуди Русия мавриди муҳокима қарор гирифт.
Сафири Тоҷикистон гуфтааст, «Тартиби воридшавии муҳоҷирони меҳнатӣ, инчунин суръат бахшидани имзои созишнома дар бахши муҳоҷират, ки ҳоло дар сатҳи баррасии тарафҳо қарор дорад, баррасӣ шуд».
Инчунин сафир қайд карда, ки бо намояндаи Вазорати Корҳои Дохилии Русия масъалаҳои марбут ба лағви қарорҳо барои манъи воридшавии гуруҳи муайяни шаҳрвандони Тоҷикистон ба Русияро ба таври муфассал баррасӣ намуданд.
Ҳамзамон зимни мулоқот тарафҳо доир ба механизми ҷалби муташаккилонаи мутахассисон аз ҳисоби шаҳрвандони Тоҷикистон ба Русия табодули афкор сурат гирифт.
Сатторов гуфта, ки «Имконияти таҳияи механизми ҷалби муҳоҷирони меҳнатӣ барои кор дар соҳаи сохтмонро баррасӣ кардем».
Дипломат ёдовар шудааст, ки тибқи қарори мақомоти Русия, муҳоҷирони меҳнатӣ бо дархости ширкатҳои сохтмонӣ ба кор дар сохтмонҳо ҷалб карда мешаванд.
Ҷонибҳо инчунин масъалаи қонунигардонии аъзои оилаи муҳоҷирони меҳнатиро низ баррасӣ карданд.
Сатторов зикр кардааст, ки то ҳол оилаҳое ҳастанд, ки фарзандонашон дар ҳолати ғайриқонунӣ қарор доранд, онҳо наметавонанд ба мактаб ва боғчаҳо раванд ва ин як мушкили ҷиддии иҷтимоӣ аст.
«Агар дар бораи ҳамгироии шаҳрвандони Тоҷикистон, ки дар Русия зиндагӣ мекунад, бигӯем, ташрифи кӯдакон ба мактабҳову кӯдакистонҳо имкон медиҳад дар ин сину сол зуд забони русиро аз худ кунанд ва ба ҷомеъа ҳамгиро карда шаванд», — гуфт Сатторов.
Ба ақидаи сафир, агар яке аз волидон дар Русия кор кунаду пули патент супорад, пас фарзандаш ҳатман бояд имкон дошта бошад дар мактаб таҳсил кунаду забон биомӯзад.
Сафир дар робита ба масъалаи барқароршавии парвозҳои мустақим миёни Русия ва Тоҷикистон таъкид кард, ки вазъи эпидемиологӣ дар Тоҷикистон ба таври назаррас беҳтар гардидааст.
Сафири Тоҷикистон дар Русия таъкид доштааст, ки зимни дидор бо Валентина Казакова аҳамияти ҳамоҳангсозии минбаъдаи фаъолият бо мақсади танзими равандҳои муҳоҷират ва ҳифзи ҳуқуқҳои шаҳрвандони Тоҷикистон таъкид карда шуд.
Гуфта шудааст, ки дар ин робита, омодагии тарафайн ҷиҳати мусоидат ба анҷоми раванди мувофиқасозии лоиҳаи созишномаҳо дар соҳаи муҳоҷират иброз гардид.