Илон Маск соҳиби нави твиттер пас аз як назарсанҷӣ дар ин платформ, аккаунти раисҷумҳури собиқи Амрикоро фаъол кард. Трамп аммо гуфтааст қасд надорад платформ Truth Social-ро тарк кунад.
Платформи твиитер, январи 2021 пас аз он ки Доналд Трамп, раисҷумҳури собиқи Иёлоти муттаҳида талвеҳан аз тарафдоронаш хост аз раъйашон дар интихоботи риёсатҷумҳурӣ дифоъ кунанд ва пас аз ҳамлаи тарафдорони Трамп ба сохтмони Капитол, ба далели ташвиқ ба хушунат баста шуд. Ҳоло молики ҷадиди твитер, Илон Маск бо анҷоми як назарсанҷӣ дар ин платформ, ки дар он 51,8 дарсад ширкаткунандагон ба бозгардондани ҳисоби твиттерии Трамп раъйи мусбат додаанд, аккаунти Трампро дубора фаъол кард.
Ин ҳисоб бо адреси “realDonaldTrump@” ҳамакнун дар дастрас аст.
Ҳисоби твиттери Трамп пеш аз баста шудан беш аз 80 миллион думболкунанда дошт. Танҳо чанд дақиқа пас аз боз шудани муҷаддади ин аккаунт теъдоди думболкунандаҳо ба як миллион расид. Ин рақам дар ҳоли ҳозир беш аз 87 миллион нафар аст. Ҳисоби корбарии Трамп дар платформи Truth Social танҳо каме беш аз чаҳор миллион думболкунанда дорад.
Ҳисоби твиттери Трамп дар ҳоле ба ӯ бозгардонда шуд, ки ӯ эълом карда қасд дорад дар интихоботи риёсатҷумҳурии 2024 номзад шавад ва барои ин рақобат, платформе монанди твиттер метавонад бисёр ба Трамп кумак кунад.
Илон Маск пас аз поёни мӯҳлати назарсанҷӣ дар бораи бозгардондани аккаунти твиттери Трамп навишт: “мардум ҳарфашонро заданд.
Танҳо се дарсад корбарони твиттер ба бозгашти Трамп раъй доданд
Ин назарсанҷӣ албатта нишонгари назари воқеии ҳамаи корбарони твиттер нест чаро, ки дар он танҳо 15 миллион корбар ширкат кардаанд, дар ҳоле, ки бар асоси ҷадидтарин омор, твиттер дар ҳоли ҳозир 238 миллион ҳисоби фаъол дорад. Бад-ин тартиб танҳо каме беш аз 6 дарсад корбарони твиттер дар ин назарсанҷӣ ширкат кардаанд.
Бар асоси ин назарсанҷӣ 51,8 дарсад аз ширкаткунандагон ба бозгашти Трамп ба твиттер раъйи мусбат додаанд яъне 7 миллиону 800 ҳазор корбар, ки муодили 3,3 дарсад аз кулли корбарони твиттер аст.
Ҳисоби корбарии Трамп дар твиттер январи 2021 баста шуд. Ў дар рӯзи 6 январ ва пас аз ҳамлаи тарафдоронаш ба сохтимони капитол, талвеҳан ин иқдомро таъйид ва бо ҳамлакунандагон ба Капитол ибрози ҳамдардӣ кард.
Нақзи чандбораи қавонини твиттер аз сӯи Трамп
Трамп дар рӯзи шашуми январ, ки натиҷаи интихоботи риёсатҷумҳурӣ расман таъйид мешавад, ба тарафдоронаш ваъда дода буд, ки муовинаш Майк Пенс натиҷаи интихоботро таъйид нахоҳад кард. Ў аммо кӯтоҳзамоне пеш аз оғози ҳамлаи тарафдоронаш ба Капитол дар твиттер навишт, ки Пенс шуҷоати лозим барои анҷоми “кори дуруст”-ро надорад. Пас аз он тарафдорони Трамп бо шиори “Майк Пенсро дор бизанед” ба сохтмони Кунгура ҳамлавар шуданд.
Платформи Твиттер ин иқдоми Трампро даъват ба хушунат донист ва аккаунти ӯро масдуд кард. Твитҳои таҳриккунанда ва ноқизи қавонини Трамп аммо дар ҳисобе, ки муҷаддадан боз шудааст, дида намешаванд.
Аммо ин аввалин нақзи қавонини твиттер аз сӯи Трамп набуд. Ў пеш аз ин низ борҳо бидуни ироаи санад ва мадрик иддао карда буд, ки Ҷо Байден раъйҳои ӯро дуздида ва дар интихобот тақаллуб шудааст.
Соҳибони пешини твиттер борҳо гуфта буданд, ки ҳеҷ роҳе барои бозгашти Трамп ба твиттер вуҷуд надорад. Илон Маск аммо, ки тарафдориаш аз ҷумҳурихоҳон ошкор аст аз моҳҳо пеш таъкид карда буд, ки бо шурӯъи кораш дар твиттер ҳеҷ ҳисобе барои ҳамеша баста нахоҳад монд. Ў барои мисоли мушаххасе аз аккаунти масдудшудаи Трамп ном бурда буд.
Бо ин ҳол, Маск се ҳафта пеш эълом кард, ки қабл аз бозгардондани ҳисобҳои муҳим, шӯрое барои расидагӣ ба мӯҳтавои ҷанҷолии ин ҳисобҳо ташкил хоҳад шуд. Иқдоме, ки ҳаргиз анҷом нашуд.
Трамп борҳо гуфтааст, ки намехоҳад ба твиттер бозгардад. Ў гуфта платформи худсохтааш Truth Social хеле бештар ба мазоқи ӯ хуш меояд ва хеле беҳтар аз твиттер аст. Ин платформ як нусхаи копия аз твиттер аст.
Ба ин ҳол Трамп рӯзи шанбе ва пеш аз поёни мӯҳлати назарсанҷии Маск барои фаъол кардан аккаунти Трамп, ба тарафдоронаш тавсия кард дар ин назарсанҷӣ ширкат кунанд. Ў аммо дар Truth Social навишт: “мо ҳеҷ ҷо намеравем. Truth Social хос аст! “
Фейсбук, ки аккаунти Трамп дар он ҷо низ аз январи 2021 масдуд шудааст, қарор аст дар моҳи январи соли оянда дар бораи бозгашти Трамп ба ин платформ тасмимгирӣ кунад.