Маоши миёна дар Тоҷикистон ба ҳолати моҳи декабри соли 2022 беш аз 1 ҳазору 730 сомониро ташкил медиҳад. Ин маблағ, ки ба 170 доллар баробар аст, барои хӯрондани як нафар ҳам кофӣ нест, чи рачаб ба як хонавода.
Ин ҳам дар ҳолест, ки ба гуфтаи вазири меҳнат, муҳоҷират ва шуғли аҳолии Тоҷикистон, Гулнора Ҳасанзода ҳаҷми маоши миёна дар кишвар дар муқоиса бо ҳамин давраи соли гузашта наздики 205 сомонӣ ё беш аз 13% афзоиш ёфтааст.
Қаблан мақомоти Хатлон эълон дошта буданд, ки камтарин маошро дар вилоят кишоварзон мегиранд, ки дар соли гузашта ба ҳисоби миёна ба 604 сомонӣ баробар шудааст.
Музди миёнаи моҳонаи кормандони кироя дар вилоят ба 1289 сомонӣ, каме бештар аз 100 доллари амрикоӣ баробар шудааст.
Музди кории кормандони соҳаи истихроҷи канданиҳои фоиданок 2363 сомониро ташкил додаст. Кормандони соҳаи неруи барқ, газу гамидиҳӣ дар ҳаҷми 3582 сомонӣ маош мегирифтаанд, ки аз баландтарин нишондодҳо мебошад.
Сохтмончиён дар ҷануби Тоҷикистон ба ҳисоби миёна 1948 сомонӣ ҳар моҳ мегирифтаанд. Дар ҳоле, ки кишоварзон аз маоши миёна пасттар музд мегиранд, дар бахшҳои дигари бахши воқеӣ музди меҳнат аз нишондоди миёна аз ним то 2,8 баробар бештар мебошад.
Дар мавриди маош дар бахши хизматрасонӣ иттилоъ дода шуд, ки баландтарин музди миёнаро кормандони молия ва қарз мегиранд.
Тибқи омори расмӣ, соли 2022 музди миёнаи кории кормандони ташкилотҳои молиявӣ 3303 сомонӣ будааст, ки 2,6 маротиба аз сатҳи музди миёнаи корӣ дар вилоят бештар мебошад.