Додгоҳи ноҳияи Шоҳмансури шаҳри Душанбе имрӯз, 4-уми октябр, муҳокимаи парвандаи журналисти боздоштшудаи тоҷик Абдуллоҳ Ғурбатиро ба анҷом расонид ва ӯро ба 7,5 соли зиндон маҳкум намуд.
Вакили дифоъи ӯ мегӯяд, ки аз болои ҳукми додгоҳ шикоят хоҳад кард, аммо бозбинии ҳукми зинаи аввали додгоҳ дар Тоҷикистон бисёр кам иттифоқ меафтад..
Мурофиа додгоҳии Абдуллоҳ Ғурбатӣ имрӯз, 4-уми октябр, дар боздоштгоҳи муваққатӣ (СИЗО) баргузор гардид ва дар он сухани охирин ба журналист дода шудааст. Дар ин бора аз Маркази мустақил оид ба ҳифзи ҳуқуқи инсон хабар медиҳанд.
Ин маркази менависад, ки Абдуллоҳ Ғурбатӣ зимни сухани охирини худ бори дигар таъкид намудааст, ки гунаҳкор нест ва ҳеҷ яке аз гуноҳи эълоншударо эътироф намекунад.
Новобаста ба ин, додгоҳ Абдуллоҳ Ғурбатиро бо моддаҳои 328 қисми 1, 330 қисми 1 ва 307 қисми 2 банди 3-и КҶ гунаҳкор карда, ба 7,5 соли зиндон равонаи зиндон намуд.
Ҳамсар ва модари Абдуллоҳ дарҳол, пас аз огоҳ шудан аз ҳукми додгоҳ гуфтанд, ки бо ҳукм розӣ нестанд ва онро ноодилона меҳисобанд. Онҳо гуфтанд, аз болои ҳукм ҳатман шикоят хоҳанд кард.
Дирӯз, 3-юми октябр, зимни ҷаласаи додгоҳӣ айбдоркунандаи давлатӣ аз додрас хоҳиш карда буд, ки ба Абдуллоҳ 8 соли зиндони низомаш пурзӯр таъйин карда шавад, аммо додрас ҷаласаи навбатиро ба рӯзи дигар, аммо номаълум гузошта буд.
Гуфтанист, ки мурофиаи Абдуллоҳ Ғурбати дар бинои боздоштгоҳ ва пушти дарҳои баста ҷараён гирифт ва ба он модар, ҳамсар, хешовандони Абдуллоҳ ва рӯзноманигоронро роҳ надоданд.
Сабаби ба мурофиа роҳ надодани пайвандони наздики Абдуллоҳ ва журналистон ва ҳамин тавр, дар бинои боздоштгоҳ ва пушти дарҳои баста баргузор намудани мурофиа то ҳол маълум нест ва бо гузашти се ҷаласаи додгоҳӣ касе шарҳ намедиҳад.
Қаблан ҳамсари Абдуллоҳ бо ирсоли мактуби кушод ба унвони раисҷумҳур Эмомалӣ Раҳмон хоста буд, ки муҳокимаи парвандаи шавҳарашро зери назорати шахсии худ гирад ва нагузорад, ки як оилаи ҷавон аз ҳам ҷудо шавад.
Абдуллоҳ Ғурбатӣ яке аз чор журналистони боздоштшудаи тоҷик аст. Ӯ замоне боздошт гардид, ки дар робита ба парвандаи Далери Имомалӣ, блогери боздоштшудаи тоҷик ба прокуратураи ноҳияи Шоҳмансур даъват гардида буд.
Дар оғоз, мақомот ӯро барои “таҳқири намояндаи ҳокимият, истифодаи зӯроварӣ ба муқобили намояндаи ҳокимият” гумонбар медонистанд, вале баъдан Абдуллоҳ ба аъзогии ҳизби дар Тоҷикистон мамнуи наҳзати исломӣ гумонбар дониста шуд.