Рӯзномаи Дейли Телеграф гузориш дод, ки бино ба иттилооти дарёфтааш аз Кремл, раисҷумҳури Русия фармони маҳрамонаеро имзо кардааст, ки артиш метавонад то як миллион неруро барои ҷанги Украина ҷалб кунад.
Пеш аз ин путин расман дастури басиҷи 300 ҳазор неруро барои ширкат дар ин ҷанг содир карда буд.
Ба навиштаи ин рӯзнома, як мақоми Кремл гуфтааст, ки шумори неруҳои ҷалбшаванда ба дархости артиши Русия маҳрамона боқӣ мондааст.
Як пурсиши Паём байни тоҷикони муқими Русия дар шаҳрҳои гуногуни ин кишвар нишон дод, ки танҳо дар рӯзи аввали судури фармон даъватнома ба комиссариатҳои ҳарбӣ дарёфт кардаанд. Дар Русия наздики 2 миллион тоҷикон зиндагӣ мекунанд ва хатари ҷалби даҳҳо ҳазор мардон вуҷуд дорад.
Пас аз фармони нави Путин, мавҷе аз нигаронӣ дар миёни мардуми Русия ба хотири ширкати фарзандонашон дар ҷанги Укроин ба вуҷуд омадааст, ки то кунун ба гуфтаи ҳукумати Русия беш аз 5 ҳазор неруи русӣ дар он ҷон бохтаанд. Мақомоти Укроин шумори сарбозони кушташудаи рус дар ин ҷангро 55 ҳазор нафар ва Хадамоти ҷосусии Бритониё наздики 30 000 нафар мегӯянд.
Тибқи тахмини мақомоти Укроин беш аз 100 000 нафар ва тахмини Хадамоти ҷосусии Бритониё беша аз 60 000 сарбози рус дар ин ҷанг маҷрӯҳ шудаанд.
Рӯзи чаҳоршанбе шаҳрҳои мухталифи Русия шоҳиди тазоҳуроти даҳҳо нафар дар эътироз ба фармони басиҷ буд, ки ба гуфтаи хабаргузори Франс пресс дасти кам 1500 эътирозкунанда дастгир шуданд.
Пеш аз ин раисҷумҳури Русия гуфта буд, ки дар “амалиёти низомии Укроин” аз ҷалби ҷавонони оддӣ худдори меварзд аммо ба назар меояд, ки афзоиши талафоти неруҳои русӣ боиси камбуди неруи ҷангӣ шудааст ва ҳоло ҳукумати Русия мехоҳад бо ҷалби неруи ҷадид ин камбудро рафъ кунад.
Намояндаи як хонаводаи калони тоҷик дар Бошқирдистон дирӯз ба Паём гуфта буд, ки танҳо дар хонаводаи онҳо 8 нафар даъватномаи ҳузур ба комиссариати ҳарбӣ гирифтаанд, ки 6 нафари онҳо дар артиш набудаанд ва аз 18 то 23 сол доранд.
Ин дар ҳолест, ки ҳукумати Русия гуфтааст, ки танҳо афроди дорои собиқаи ҷангӣ ва хидмат дар артишро ба Укроин эъзом хоҳад кард.