Дар ҳоле ки Эмомалӣ Раҳмон, раисҷумҳури Тоҷикистон ахиран ҷиҳати ду маротиба боло бурдани маоши табибони машғули мубориза бо коронавирус фармон дод, дар ноҳияи Айнӣ аз моҳи март ба ин тараф маоши табибонро баракс кам кардаанд.
Дар ин бора сомонаи Ахбор иттилоъ дода навишт, ду моҳ боз сардорони марказҳои саломатӣ дар ин ноҳия 300 сомонӣ маоши камтар, яъне ба ҷои 1130 сомонии қаблӣ ҳамагӣ 830 сомонӣ маош мегиранд. Маълум нест, ки ин 300 сомониро ҳар моҳ аз маоши онҳо ҳамчун нархи либосу айнакҳои муҳофизатӣ кам карда истодаанд ва ё инҷо иллати дигаре вуҷуд дорад. Дар ҳар сурат, табибон аз ин ки маоши бе он ҳам ночизи онҳоро боз ҳам ночизтар кардаанд, хеле нороҳатанд ва умедворанд, ки масъулин ба додашон мерасанд.
Дар замони мубориза бар зидди бемории коронавирус ё «COVID-19» дар тамоми олам нисбати табибон дастгирӣ ва ғамхориҳои зиёде нишон дода мешавад.
Як гурӯҳ табибони марказҳои саломатии Айнӣ ба шарти ифшо нагардидани номашон гуфтанд: «Аз моҳи март инҷониб 300 сомонӣ маоши сардорони марказҳои саломатиро кам кардаанд. Қаблан сардорони марказҳои саломатӣ, 1130 сомонӣ моҳона мегирифтанд, ҳоло бошад 830 сомонӣ мегиранд”.
Бино ба иттилои манбаъ, табибон гуфтаанд, мо ҷони худро дар хатар гузошта дар ба дари хонаи мардум мегардем, сокинони деҳаҳоро назорат мекунем, аз ҳолашон ҳамеша хабар мегирем, боз дар ин шабу рӯз, ки гирифторони коронавирус хеле зиёд аст, ҷони худро ба хатар гузошта онҳоро табобат мекунем, вале маоши моро ба ҷои зиёд кардан баракс кам карданд.
Табибон дар идома иброз доштанд, ки вақте ба муҳосиботи беморхона муроҷиат намудем, ки чаро маоши мо кам карда шуд?, ҷавоб гардонданд, ки аз шӯъбаи молия гуфтаанд, ки то ин вақт Шумо маоши зиёд мегирифтед, ба ҳамин хотир кам карданд, буҷаи ноҳия имсол намерасад.
Табибон гуфтаанд, ноҳияи Айнӣ, ки яке аз ноҳияҳои саноатӣ дар Тоҷикистон маҳсуб мешавад ва буҷаи ҷумҳуриву вилоятро аз ҳисоби конҳои тилову ангишташ пур мекунад, оё қудрати додани як маоши шоистатар барои табибонашро надорад, ки сари маоши бе ин ҳам ночизи онҳоро буридаанд ва мехоҳанд бо ду кило картошкаву ду кило пиёз онҳоро ба кор дилгарм кунанд? Ин мисли кӯдакро қанде ба дасташ додану фирефтан аст.
Сообщение ПАЁМ.net.