Як ноболиғ дар шӯъбаи корҳои дохилии ноҳияи Ашт ба ҳайси асир нигоҳдорӣ мешавад. Гуфта мешавад ноболиғ барои баргардонидани ду бародараш аз Русия асир гирифта шудааст.
Манбаъи “Паём”, мегӯяд падар ва ду бародари ин хонандаи синфи 10 дар Русия қарор доранд ва бо асир гирифтани ӯ мақомот мехоҳанд бародаронаш баргашта дар сафи артиш хизмат кунанд.
Манбаъ гуфт натавониста ному насаби наврасро муайян кунад, аммо “аз лаҳҷааш маълум, ки аз ҷамоати Понғоз аст”.
Асир гирифтани аъзои хонавода барои баргардонидани ҷавонон аз Русия дар ноҳияи Ашт бори аввал нест, ки иттифоқ меафтад. Қаблан ҳам мақомот бо асиргирии падар ва ҳатто модари ҷанд ҷавон ё муваффақ ба баргардонидани фарзандони онҳо аз Русия ва ё гирифтани ришваҳои калон шудаанд.
Як сокини ноҳия, ки нахост номаш ифшо шавад, ба “Паём” гуфт, ки бародараш ду ҳафта дар боздошгоҳи пулиси ноҳия асир будааст, то билохира бо пардохти 5 000 доллар ҷони худашро аз маҳбасу фарзандаш аз артишро раҳо сохтааст.