Имрӯз, 6-уми ноябр бояд ҳукми Бузургмеҳр Ёров, вакили шинохтаи дифоъ эълон шавад. Мурофиъа бояд соати 9-и субҳ оғоз мешуд, аммо то ҳанӯз саршавии он маълум нест.
Сабаби таъхир чун ҳарвақта, ҷамъшавии зиёди рӯзноманигорон ва намояндагони созмонҳои байналмиллаливу корпусҳои дипломатӣ аст, ки имрӯз аз ҳарвақта бештар ҷамъ шудаанд. Атрофи биноро муҳофизини яроқнок печонидаанд ва касеро иҷозат намедиҳанд ба дохил ворид шавад.
Кормандони додгоҳ гоҳ-гоҳ аз тирезаи ошёнаи дуюм ба ҷамъшудагон нигоҳ мекунанд. Касе то ҳанӯз расман сабаби ба таъхир афтодани мурофиаро эълон накардааст. Баъзеҳо тахмин мезананд, ки он шояд ба рӯзи дигар гузаронида шавад.
Овардани муҳофизони мусаллаҳ дарак аз он медиҳад, ки мақомот аз ҷамъшавии мардум хавф доранд. Вале то ҳанӯз намояндагони ҷомеъаи шаҳрвандӣ ва мардуми оддӣ кам ба назар мерасанд.