Фурӯши баъзе намуди меваҳо, ки хосияти тақвияти системаи эминии баданро доранд, дар Тоҷикистон афзоиш пайдо кардааст.
Мақомот то ҳол ҳеҷ мавриде аз гирифторӣ ба бемории коронавирусро эълом накардааст, вале бисёре аз сокинони Тоҷикистон бар ин боваранд, ки бо сирпиез, лиму ва дуди испанд системаи эминӣ, яъне имунитет тақвият меёбад ва ба ҳуҷуми коронавирус муқовимат мекунад.
Се баробар шудани талабот барои хариди сирпиез ва лиму дар бозорҳои Тоҷикистон дар як моҳи гузашта сабаб шуда, ки қимати як килограмм сирпиёз ба 11 доллар ва лиму низ ба 3 доллар бирасад. Ҳамчунин қимати испанд низ ду баробар шудааст. Фурӯшандагон аз афзоиши талабот барои хариди сирпиез ва лиму розӣ ҳастанд ва аз гуфтани хосиятҳои муъҷизаосои ин меваҳо хаста намешаванд.
Аммо сири аслии қимматшавии лимуро коршиносон дар он медонанд, ки ин намуди мева бештар аз Чин ба Тоҷикистон ворид мешуд ва дар ҳоли ҳозир марзҳои ин кишвар бо Тоҷикистон баста аст. Онҳо мегӯянд, дар Тоҷикистон анбори захираи лимуҳои ватанӣ кайҳо холӣ шудааст.