Парвиз Шодмонзода, роҳбари «Тоҷик Эйр», 23-юми июл дар ҳузури хабарнигорон гуфт, «минбаъд дар мавриди молу мулк ва суратҳисоби бонки «Тоҷик Эйр», дар хориҷи кишвар дар ҳеч гӯшаву канори ҷаҳон ҳабс, маҳдудият ва гаронии дигар вуҷуд надорад.”
Ба гуфтаи Шодмонзода, созишномаи оштӣ миёни «Тоҷик Эйр» ва «Скайроуд лизинг» моҳи январи имсол имзо шуда, моҳи май аз сӯи Додгоҳи арбитражии Маскав тасдиқ шуд.
Парвиз Шодмонзода ҳамчунин гуфт, бар асоси ин созиш, «Тоҷик Эйр» маблағи заруриро ба суратҳисоби «Скайроуд лизинг» гузаронд ва дар иваз ду ҳавопаймои баҳсӣ, моли «Тоҷик Эйр» шуданд. «Скайроуд лизинг» аз тамоми даъвоҳои минбаъда даст кашид»,-гуфт раиси «Тоҷик Эйр».
Назари ширкати «Скайроуд лизинг» ба ин хабар маълум нест.
Раиси ширкати «Тоҷик Эйр» нагуфт, ки барои расидан ба созиш ба ширкати «Скайроуд лизинг», чӣ қадар маблағ гузаронданд.
Мудири «Тоҷик Эйр» моҳи январи имсол гуфт, аллакай 500 ҳазор долларро ба ҳисоби «Скайроуд лизинг» гузарондаанд ва қарор аст 1,5 миллион доллари дигарро пардохт кунанд.
Ба гуфтаи Парвиз Шодмонзода, баҳс бо коршарики литвонӣ, як монеаи асосӣ дар роҳи барқарор кардани парвозҳои байнулмилалӣ буд, ки ҳоло бартараф шудааст.
Бо ин вуҷуд, феълан маълум нест, ки ҳавопаймоҳои «Тоҷик Эйр» кай парвозҳо ба хориҷи кишварро азсар мегиранд. Раиси ин ширкат мегӯяд, барои гирифтани ҳавопаймоҳои нав бо чанд ширкати хориҷӣ гуфтугӯ доранд.
Баҳси «Тоҷик Эйр» ва ширкати “Скайроуд Лизинг” аз соли 2013 идома дорад. «Скайроуд Лизинг» даъво дошт, ки коршарики тоҷикаш бояд 20 миллион доллар бипардозад. Масъулони ширкати «Тоҷик Эйр» ин даъворо қабул надоштанд.
Пештар Додгоҳи арбитражии шаҳри Вилнюс «Тоҷик Эйр»-ро ба пардохти ин миқдор маблағ вазифадор карда буд. Додгоҳи иқтисодии Душанбе аввал даъворо рад кард, аммо дертар Додгоҳи олии иқтисодӣ қарори Додгоҳи ҳаками Вилнюсро пазируфт.
Дар пайи баҳс бо «Скайроуд лизинг», як ҳавопаймои «Тоҷик Эйр»-ро дар фурудгоҳи Внуковои Маскав ҳабс карданд. Мудири «Тоҷик Эйр» мегӯяд, ин ҳавопаймо аз соли 2019 дар ҳабс буд ва ҳоло ба таъмир ниёз дорад.