Шоми сешанбе дар канали Telegram-и раисиҷумҳури Украина Володимир Зеленский акси собиқ ҳамраиси ҳизби «Платформаи мухолифин — барои ҳаёт» Виктор Медведчук бо либоси низомӣ ва дастони баста пайдо шуд.
Расонаҳои хабарӣ навиштанд, ки Хадамоти амнияти Украина «яке аз наздиктарин шарикони Путинро» боздошт кардааст.
Хадамоти амнияти Украина Виктор Медведчук, олигарх ва раиси шӯрои сиёсии «Платформаи мухолифин — барои ҳаёт»- ро боздошт кардааст.
Моҳи октябри соли 2021 додгоҳи Печерски Киев иҷоза дода буд, ки Виктор Медведчук то 10 марти соли ҷорӣ ба ҳабс гирифта шавад. Пас аз ин Антон Геращенко, мушовири вазири умури дохилии Украина хабар дод, ки муттаҳам аз ҳабси хонагӣ фирор кардааст. Ба гуфтаи вакили мудофеъ Лариса Чередниченко, Медведчук ба далели хатари зиёд ба ҷонаш аз манзилаш дар Киев берун шуда, ба ҷои амнтари Киев интиқол ёфт.
Моҳи майи соли 2021 Виктор Медведчук ба хиёнат ба ватан, бо иттиҳоми дубора бо роҳи ғайриқонунӣ сабти ном кардани кони гази Украина дар Қрим ва дар моҳи октябр бо иттиҳоми кӯмак ба фаъолиятҳои террористӣ муттаҳам шудааст. Ба гуфтаи муфаттишон, Виктор Медведчук ба қочоқи ангишт аз минтақаҳои муваққатан ишғолшудаи Донбасс машғул будааст.
Додситонии кулли Украина иддао кардааст, ки равобити Виктор Медведчук бо Маскав амнияти иқтисодии кишварро дар солҳои 2014-2015 халалдор кардааст. Ба гуфтаи вай, олигарх Украинаро аз имкони диверсификатсияи манобеъи энержии худ маҳрум кардааст.
Медведчукро ҳамчунин «яке аз наздиктарин шарикони Путин» тавсиф мекунанд.
Ҷониби Русия ҳанӯз хабарро тасдиқ накардааст. Песков гуфт, ки хабарҳо дар бораи боздошти Медведчук дар Украина аввал бояд тафтиш карда шаванд.
Ба гуфтаи Володимир Зеленский, сиёсатмадор дар натиҷаи амалиёти СБУ боздошт шудааст.