Рӯзномаи амрикоии “The Wall Street Journal” рӯзи якшанбе гузориш дод, ки Иёлоти мутахида се моҳ пеш ҷаласаи маҳрамона бо мушорикати Исроил ва бархе кишварҳои арабӣ барои баррасии наҳваи муқобила бо Эрон баргузор кардааст.
Бино ба ин гузориш дар ин ҷаласаи маҳрамона, ки дар Шарм уш-Шайхи Миср баргузор шуд роҳҳои муқобила бо пешрафтҳои паҳподӣ ва мушакии Эрон баррась шудааст.
“The Wall Street Journal” манбаъи гузориши худро шуморе аз мақомоти расмии Амрико ва кишварҳои минтақа унвон кардааст.
Намояндагони кишварҳои Исроил, Арабистон, Қатар, Урдун, Миср, Амороти арабии муттаҳида ва Баҳрайн дар ин нишаст, ки ба ибтикори Амрико баргузор шуд ширкат карданд. Франк Макензӣ, фармондеҳи вақти ситоди фармондеҳии марказии Иёлоти муттаҳидаи Амрико дар ин нишаст ҳузур дошт.
Файёз ибни Ҳомид ал Руилӣ, раиси ситоди муштараки нерӯҳои мусаллаҳи Арабистони саудӣ ва Авив Кохави, раиси ситоди кулли артиши Исроил низ дар ин ҷаласа ширкат доштаанд. Ин дар ҳоле аст, ки кишварҳои Уммон ва Қувейт барои ширкат дар ин ҷаласа намояндаеро ба Шарм уш-Шайх нафарстода буданд.
Дар бахше аз гузориши “The Wall Street Journal” омадааст, ки кишварҳои ширкаткунанда дар ин нишаст ба як тавофуқи усулӣ даст ёфтанд, ки бар асоси он созукоре “барои иттилоърасонии сареъ дар сурати шиносоии таҳдиди ҳавоӣ” таъриф шудааст.
Гузориши “The Wall Street Journal” танҳо ду рӯз пас аз он мунташир мешавад, ки Абдуллоҳи II ал-Ҳусейн, подшоҳи Урдун ба сурати аланӣ аз идеяи ташкили иттиҳодии низомӣ монанди НАТО дар Ховари Миёна сухан гуфт. Аз сӯи дигар ҳузури фармондеҳони олирутбаи низомии Арабистон ва Исроил дар нишасти Шарм уш-Шайх бо таваҷҷуҳ ба ин ки ду кишвар робитаи дипломатик надоранд дорои аҳамият аст.
Кишварҳои Аморати арабии муттаҳида ва Баҳрайн дар охирин моҳҳои ҳузури Доналд Трамп, раисҷумҳури пешини Амрико робитаи худ бо Исроилро оддӣ карданд.
Ҷо Байден, раисҷумҳури Амрико қарор аст чанд ҳафтаи дигар ба Исроил ва Арабистони саудӣ сафар кунад. Интизор меравад, ки муқобила бо Эрон аз ҷумлаи меҳварҳои гуфтугӯи раисҷумҳурии Иёлоти муттаҳида бо мақомоти ин ду кишвар бошад.