Ҳукумати Тоҷикистон муҳлати бақайдгирии дигарбораи симкортҳо бо шиносномаҳои намунаи соли 2014-ро то 15 феврали соли 2023 муқаррар кардааст
Шумораи симкортҳое, ки бо пешниҳоди шиносномаи намунаи соли 2014 ба қайд гирифта нашудааст, беш аз 2 млн-ро ташкил медиҳад.
Дар ин бора дар нишасти матбуотии Хадамоти алоқаи Тоҷикистон иттилоъ дода шуд.
Гуфта мешавад, аз миёни беш аз 2 млн симкорте, ки то ҳол бо шиносномаҳои намунаи соли 1996 дар қайданд, беш аз 880 ҳазорашон фаъол мебошанд.
Бар асоси қарори ҳукумати Тоҷикистон, ки ҳанӯз соли 2016 дар бораи тартиб ва талаботи пайвастшавӣ ба шабакаҳои алоқаи барқӣ қабул шуда буд, ҳамаи муштариёни алоқаи мобилӣ бояд симкортҳояшонро бо шиносномаҳои ID, намунаи cоли 2014 аз нав ба қайд гиранд, ки то ҳол пурра иҷро нашудааст.
Ҳукумат барои сабти дигарбораи симкортҳо борҳо муҳлати онро тамдид карда, бори охир моҳи феврали соли 2022 онро то 15 феврали соли 2023 дароз кард. Феълан маълум нест, ки ҳукумат дигарбора ин муҳлатро тамдид хоҳад кард ё на.
Ба гузориши Хадамоти алоқаи кишвар, феълан шумораи умумии муштариёни соҳаи алоқа ба 8,3 млн баробар аст, ки аз ин 6,4 млн ададашон фаъоланд.