Иллати инфиҷор дар таъсисоти атомии Натанз дар пардаи ибҳом қарор дорад. Бозори гумонзанӣ дар бораи нақши эҳтимолии Исроил дар ин инфиҷор ҳамчунон доғ аст. Ню-Йорк Таймз дар гузорише ба нақл аз ду манбаъи амниятӣ хабар аз нақши Исроил дар вуқӯъи ин инфиҷор додааст. 

Рӯзномаи Ню-Йорк Таймз бо интишори гузориши ихтисосӣ ба инфиҷори рӯзи панҷшанбе, дувум июл дар таъсисоти ғанисозии урани Натанз пардохтааст. 

Хабарнигорони ин рӯзнома ба нақл аз як манбаъи иттилоотии вобаста ба як кишвари Ховари Миёна ва ҳамчунин изҳороти як узви иттилооти Сипоҳи посдорон аз нақши Исроил дар инфиҷори Натанз хабар додаанд. 

Ҳеҷ як аз ин ду манбаъи иттилоотӣ ҳозир ба фош шудани ҳуввияти худ нашудаанд. 

Ню-Йорк Таймз гузориши худро бо изҳороти мақомоти Ҷумҳурии Исломии Эрон мабнӣ бар доманаи осеби ношӣ аз вуқӯъи инфиҷор дар маркази тавлиди сентрифужҳои пешрафтаи таъсисоти Натанз оғоз кардааст. 

Масъулони Эрон, аз ҷумла Беҳрӯз Камолвандӣ, сухангӯи Ожонси атомӣ ва Алиакбар Солеҳӣ, раиси ин марказ зимни ишора ба вуқӯъи инфиҷор дар таъсисоти Натанз, муддаӣ шуда буданд, ки ин инфиҷор таваққуфе дар ғанисозии уран дар ин таъсисот эҷод намекунад. 

Эрон дар зимн эълом кардааст, ки иллати вуқӯъи инфиҷор барои масъулон равшан аст, аммо дар ҳоли ҳозир тарҷеҳ медиҳанд «ба далоили амниятӣ» дар бораи он чизе нагӯянд. 

Бомб, на ҳамлаи сайберӣ! 

Дар ҳоле ки гумонзанӣ дар бораи ҳамлаи паҳподӣ ва ё сайберӣ ба ин таъсисот матраҳ шудааст, як манбаъи амниятии вобаста ба яке аз кишварҳои Ховари Миёна ба хабарнигорони Ню-Йорк Таймз гуфтааст, ки иллати ин инфиҷор, бомби қавие буда, ки ба даруни таъсисот ворид ва дар бахши сентрифужҳои пешрафта ҷосозӣ шуда будааст. 

Ню-Йорк Таймз дар идомаи гузориши худ ба нақши Исроил ва Амрико дар эҷоди ихтилол дар кори ғанисозӣ ва фаъолиятҳои ҳастаии Эрон пардохта ва навиштааст, ки ин ду кишвар барои монеъ шудан аз дастёбии Эрон ба ҷангафрӯзҳои ҳастаӣ, то кунун иқдом ба ҳамалот сайберӣ кардаанд. 

Ин дар ҳолест, ки хабарнигорони Ню-Йорк Таймз ба нақл аз як манбаъи иттилоотии Сипоҳи посдорон гуфтааст, ки иллати инфиҷори ахир дар Натанз, ҳамлаи сайберӣ набуда ва ин бор аз як бомб барои ин инфиҷор истифода шудааст. 

Осебпазирии амнияти Эрон 

Ню-йорк Таймз дар идомаи гузориши худ навиштааст, ки ҳанӯз равшан нест ин бомбро кӣ ва чи гуна ба дохили таъсисот ва маркази сентрифужҳои пешрафтаи он мунтақил кардааст. Дар айни ҳол, хабарнигорони ин рӯзнома ростозмоӣ перомуни ин изҳоротро дар шароити кунунӣ мумкин намедонанд. 

Дар ин гузориш омадааст, ки дар сурати сиҳат доштани ин мавзӯъ, доманаи осебпазири амнияти Эрон ошкор мешавад. 

Хабарнигорон аз ҷумла ба дуздии ҳудуди ним тон иттилооти маҳрамонаи Эрон аз сӯи Исроил дар соли 2018 ишора кардааст. Иттилооте, ки аз сӯи Мосад дар ихтиёри ожонси байналмиллалии энержии атомӣ қарор гирифта ва ҳикоят аз фаъолиятҳои маҳрамона ва пинҳони ҳастаии Эрон дорад. 

Мавзеъгирии мақомоти исроилӣ 

Ню-Йорк Таймз дар идомаи гузориши худ ба изҳороти Банӣ Гонтс, вазири дифоъи Исроил ва Габи Ишканозӣ, вазири умури хориҷа ин кишвар, дар бораи инфиҷор дар Натанз пардохтааст. 

Мақомоти исроилӣ рӯзи якшанбе панҷуми июл аз изҳори назари сареҳ дар бораи масъулияти ин кишвар дар ҳодисаи инфиҷор дар Натанз худдорӣ карда, аммо бори дигар ба баёни хатароти ношӣ аз фаъолиятҳои ҳастаӣ барои минтақа ишора кардаанд. 

Банӣ Гонтс дар гуфтугӯ бо радио ва телевизиони давлатии Исроил гуфтааст: “ҳар касе метавонад дар ҳар замоне моро муттаҳам ба чунин амре кунад, аммо ман фикр намекунам, ки чунин коре саҳеҳ бошад.” 

Гонтс бе он ки нақши Исроил дар инфиҷори рӯзи панҷшанбе дар таъсисоти Натанзро рад кунад гуфтааст: “ҳар чизе, ки дар иртибот бо Эрон иттифоқ меафтад, илзоман рабте ба Исроил надорад.» 

Вазири умури хориҷаи Исроил, Габи Ишканози низ бидуни ишораи мустақим ба инфиҷори Натанз гуфта буд, ки Исроил ҳеҷ гоҳ ба Эрон иҷозаи таҷҳизи худ ба ҷангафрӯзҳои ҳастаиро нахоҳад дод. 

Ӯ дар гуфтугӯ бо рӯзномаи Иерусолем Пост гуфта буд: “мо дар ин робита иқдомоте мекунем, ки беҳтар аст ногуфта бимонанд.”