Amnesty International (Афви Байнулмилал) бо ирсоли дар номае ба раисҷумҳури Тоҷикистон Эмомалӣ Раҳмон хостори озодии фаврии Абдуллоҳи Шамсиддин шудааст. Гуфта мешавад нома рӯзи сешанбе, 11 апрел фиристода шудааст.
Ин созмони муътабар ва маъоуфи ҳомии ҳуқуқ ҳам ба ин назар аст, ки Абдуллоҳи Шамсиддинро дар робита фаъолияти падараш дар Ҳизби наҳзати исломии Тоҷикистон боздошт ва маҳкум кардаанд. Падари ӯ Шамсиддин Саидов яке аз аъзои аршади ин ҳизб аст.
Муаллифони нома навиштаанд, «аз шумо мехоҳем, барои ҳар чи зуд ошкор кардани макони Абдуллоҳи Шамсиддин чораҳои зарурӣ биандешед. Замонат бидиҳед, ки ӯ шиканҷа намешавад ва метавонад бо аъзои оилааш суҳбат кунад.»
Рӯзи 7 апрел як манбаъи “Паём” иттилоъ дод, додгоҳи ноҳияи Исмоили Сомонии Душанбе Абдуллоҳи Шамсиддин, муҳоҷири истирдодашуда аз Олмонро ба ҳафт соли зиндон мақкум кард. Манбаъ гуфт додгоҳ Абдуллоҳро бо қисми якуми моддаи маъруфи 307 (Даъвати оммавӣ барои амалӣ намудани фаъолияти экстремистӣ (ифротгароӣ) ва сафедкунии оммавии экстремизм) гунаҳкор донистааст.
Баъдан созмони Дидбони Ҳуқуқи Башар (Human Rights Watch) ин хабарро тасдиқ кард.
Мақомоти Тоҷикистон ҳанӯз дар ин бора ҳарф намезананд.
Гуфтанист, Абдуллоҳи Шамсиддин рӯзи 18 январ аз сӯи пулиси Олмон истирдод шуд ва то ҳол мақомоти Тоҷикистон ҳеҷ иттилоъи расмие дар бораи ӯ надодаанд. Вазири корҳои дохила Рамазон Раҳимзода ва Додситони кулл Юсуф Раҳмон дар нишасти солонаи матбуотиашон гуфтанд, ки ҳеҷ иттилоъе аз Абдуллоҳ надоранд.
Рӯзи 7 март ҳамсари Абдуллоҳи Шамсиддин гуфта буд, ки ӯ аз худ дарак додааст ва дар боздоштгоҳи КДАМ қарор дорад.