Рамазон Раҳимзода, Вазири корҳои дохилии Тоҷикистон гуфт кормандони вазорати зери дасташ нисбати Нилуфар Раҷабова ба ҳеҷ қонунишикание роҳ надодаанд. Ӯ ба “таҳқиқҳои зиёд” дар ин қазия ишора кард.
Вазири корҳои дохила ҳам мисли зердасташ Машраф Истамзода ва дигар ниҳодҳое, ки ба қазияи Нилуфар Раҷабова рабт доранд ба падар ва бародари ӯ ишора кард ва худи Нилуфарро гунаҳкор баровард.
“Падараш барои содир кардани ҷиноятҳои террористӣ 28 сол дар маҳбас аст ва бародараш барои ин кирдор дар кофтукоб мебошад. Худаш (Нилуфар Раҷабова) барои беэҳтиромӣ ҷарима шуд. Санҷишҳои мо нишон дод, ки кормандони мо қонуншиканӣ накарданд”, – гуфт Рамазон Раҳимзода.
Вазир гуфт таҳқиқҳои зиёд нишон додаанд, ки кормандони пулси даст ба қонуншиканӣ назадаанд.
Нилуфар Раҷабова, духтари Раҳматуллои Раҷаб, узви зиндонии Раёсати Олии Ҳизби наҳзати исломии Тоҷикистон ва хоҳари рӯзноманигор Шӯҳрати Раҳматулло моҳи ноябр аз тарафи кормандони шӯъбаи корҳои дохилии ноҳияи Сино барои сатраш боздошт шуда буд. Баъди он ки маълум гашт ӯ аз қадом хонавода аст, Машраф Истамзода, муовини сардори ин шӯъба Нилуфарро таҳқир ва таҳдид ба таҷовуз кард.
Ин қазия дар расонаҳои ҷаҳонӣ ҳам бозтоби густардае дошт ва то ҳанӯз гуфтумонҳо дар борааш дар расонаҳои байналмилал ва созмонҳои ҳуқуқи башар идома дорад. Аммо мақомоти Тоҷикистон то имрӯз ҳеҷ вокунише ба он накарда буданд.
Аввалин вокуниши сардори бевоситаи Истамзода ҳам ин шуд, ки зерадсташро бегуноҳ ва ҷабрдидаро гунаҳкор баровард.