Яке аз афроди бисёр наздик ба Ҳасан Асадуллозода, ки солҳо соҳаи авиатсияи Тоҷикистонро зери назорат дошт, боздошт шудааст. Рустам Холиқов, раиси собиқи ширкати «Тоҷик Эйр» (Tajik Air) ва мудири пешини Фурудгоҳи Душанбе бо амри Додситонии кулли Тоҷикистон боздошт шудааст.
Радиои Озодӣ бо истинод ба манобеъаш хабар додааст, ки Рустам Холиқов ба «азхудкунӣ ё исрофи маблағ», «сохтакорӣ» ва «қаллобӣ» муттаҳам буда, амволу дороиҳояш низ феълан ба ҳабс гирифта шудааст.
Ба гуфтаи манобеъи расона, парванда ба замони кораш дар ширкати «Тоҷик Эйр» пайванд доштааст.
Қаблан як таҳқиқи “Паём” нишон дода буд, ки Рустам Холиқов зери ҳимояи Ҳасан Асадуллозода гурӯҳи ҷиноии ташкил намуда, тамоми соҳаи авиатсияи кишварро зери даст гирифтааст ва солона миллионҳо доллар маблағро азхуд мекунад.