Муҳиддин Кабирӣ, раиси Ҳизби наҳзати исломии Тоҷикистон ва раҳбари Паймони миллӣ, эътилофи мухолинини тоҷик дар хориҷ аз адами вокуниши Эрон ба террористӣ шинохта шудани ҲНИТ аз ҷониби Русия интиқод кард.
Ӯ дар як паёми твиттерӣ навишт «Як рӯз қабл аз нишасти Шонгҳой Русия Наҳзати исломии Тоҷикистонро террорист эълон кард. Ҳамон рӯз Эрон расман узви ин созмон шуд ва ҳеч вокунише ба иқдоми шарики стротежики худ нишон надод.»
Раиси ҲНИТ хомӯшии Эрон дар қиболи ин тасмими Русияро зимнан қурбонӣ сохтани Наҳзати исломӣ дониста, навиштааст «Наҳзат ҳечгоҳ нақши қурбониро дар ин таомулот намепазирад, балки муборизаро бо шинохт ва воқеиятҳои нав, ҷиддитар идома хоҳад дод.»
Гуфтанист, рӯзи 14 сентябр Додгоҳи олии Русия Ҳизби наҳзати исломии Тоҷикистонро шомили ҳизбу гурӯҳҳои террористӣ ва фаъолияташон мамнӯъ дар Русия кард.
Рӯзи 15 сентябр Эрон расман ба узвияти Созмони ҳамкории Шонгҳой пазируфта шуд.
Русия ва Эрон кафилони аслии сулҳи тоҷикон буданд, ки баъди ҷанги 5 сола соли 1997 дар Маскав имзо шуд.
То ба имзо расидани сулҳ Русия аз “Фронти халкӣ”, ки зери парчами сурх меҷангиду баъдан ба ҳукумат расид ва Эрон Иттиҳоди мухолифини тоҷик, ки наҳзати исломӣ ҷузъи аслии он буд, ҳимоят мекарданд.
Дар музокирот ва имзои созишномаи сулҳ ин ду кишвар таъаҳҳуд гирифта буданд, ки аз ин сулҳ ҳимоят хоҳанд кард.