Ҳамлаи паҳподии бомдоди рӯзи чаҳоршанбе соате пас аз ҳамлаи тӯпхонаии Русия ба ду русто дар наздикии шаҳри Лиман дар шарқи Укроин сурат гирифт, ки се кушта ва ду захми барҷой гузошт.
Пас аз ин ки мақомот Русия эълом карданд паҳподҳоеро, ки саъй доштанд бомдоди чаҳоршанбе шаҳри Москваро ҳадаф қарор диҳанд сарнагун кардаанд, сухангӯи вазорати хориҷаи Амрико гуфт, ки Вашингтон ҳамла ба дохили хоки Русияро ташвиқ ё муяссар намекунад.
Аз замоне, ки ду паҳпод дар аввали моҳи майи мелодӣ дар боми Кремл тарконда шуданд, ҳамалоти ҳавопаймоҳои бидуни сарнишин дар умқи хоки Русия афзоиш ёфтааст ва дар моҳҳои ахир ба таври афзояндае пойтахти Русия ҳадаф гирифтааст.
Амрико, ки кумакҳои густурдаеро дар қолаби таслиҳот ва таҷҳизоти низомӣ барои муқобила бо таҳоҷуми Русия ба Укроин ироа кардааст, ҳамвора эълом мекунад аз ҳамалоте, ки ҳадафаш дохили Русия аст пуштибонӣ намекунад.
Сухангӯи Вазорати умури хориҷаи Амрико дар робита бо ҳамалоти паҳподии дирӯз ва имрӯз дар дохили хоки Русия гуфт, ки ин ба худи Укроин бастагӣ дорад, ки чи гуна мехоҳад аз худаш дар баробари таҳоҷуми Маскав, ки аз феврали соли гузаштаи мелодӣ оғоз шуда, дифоъ кунад. Вай афзуд, ки Русия метавонад ҳар замон, ки бихоҳад бо хурӯҷ аз Укроин ба ҷанг поён диҳад.
Хунсосозии ҳамалоти паҳподии имрӯз
Вазорати дифоъи Русия субҳи рӯзи чаҳоршанбе эълом кард, ки сомонаҳои падофанди ҳавоии ин кишвар се паҳподро, ки қасди ҳамла ба Маскавро доштанд, сарнагун карданд. Ҳамлаи имрӯз шашумин ҳамлаи пайиҳами ҳавоӣ ба пойтахти Русия буд.
Артиши Русия эълом кард яке аз ин паҳподҳоро дучор ихтилоли сигналӣ кард, ки сипас ба сохтмоне бархурд намуд. Сергей Собянин шаҳрдори Маскав низ дар канали худ дар Телеграм эълом кард, ки ин паҳпод бомдоди чаҳоршанбе ба як сохтмони дар ҳоли сохт дар маркази шаҳри Маскав бархӯрд кард. Бино бар он чи дар аксҳо дида мешавад, ба назар мерасад як тиреза аз ин сохтмони чандтабақа осеб дидааст.
Ду паҳподи дигар низ тавассути сомонаҳои падофанди ҳавоӣ дар ғарб пойтахти Русия сарнагун шудаанд.
Се кушта дар ҳамлаи паҳподӣ ба Белгород
Ҳамзамон фармондори минтақаи Белгород аз як ҳамлаи паҳподии дигари Украина дар ин минтақа ва кушта шудани се нафар дар тайи ин ҳамла дар рӯзи чаҳоршанбе хабар дод.
Вячеслав Гладков, фармондори минтақаи Белгород дар Телеграм навишт: “се ғайринизомӣ дар деҳаи Лави дар ноҳия Волуйск кушта шуданд”. Вай дар паёми худ афзуд: “низомиёни Укроин замоне, ки мардум дар хиёбон буданд, як василаи инфиҷориро аз тариқи як паҳпод партоб карданд.”
Минтақа ва шаҳри Белгороди Русия дар наздикии марзи Укроин воқеъ шудааст.
Ҳамалоти паҳподии рӯзи гузашта
Вазорати дифоъи Русия рӯзи сешанбе ҳам эълом карда буд, ки тавонистааст ду паҳподи укроиниро бидуни барҷой гузоштани талафоти ҷонӣ дар минтақаи Маскав сарнагун кунад, ба иловаи ин ки ду паҳпод ҳам бар фарози минтақаи Брянск дар марз бо Укроин сарнагун шудаанд.
Укроин маъмулан дар мавриди ин ки чӣ касе пушти ҳамалот ба хоки Русия аст изҳори назар намекунад, аммо ба назар мерасад аз замоне, ки ду паҳпод бар фарози Кремл дар аввали моҳи май мунҳадим шуд, чунин ҳамалотеро афзоиш додааст.
Чунин ҳамалот барои муддати кӯтоҳе парвозҳоро халалдор карда ва умдатан хисорати ҷузъӣ ба сохтмонҳо ворид мекунад. Дар ҳамин ҳол қатъи ҳатто кӯтоҳмуддати парвозҳо аз фурӯдгоҳҳои Маскав миллионҳо доллар ҳазина доранд.
Хабаргузории ТАСС-и Русия гузориш дод, ки фурӯдгоҳҳои Маскав бомдоди рӯзи чаҳоршанбе парвозҳои худро мутаваққиф карданд. Фурӯдгоҳҳои бузурги атрофи пойтахти Русия дар рӯзҳои ахир ба далели фаъолияти паҳподҳои укроинӣ борҳо бар рӯй парвозҳои хурӯҷӣ ва вурудӣ баста шудаанд.