Имрӯз 1 феврали соли 2018 Президенти Ҷумҳурии Қирғизистон Сооронбой Жээнбеков бо сафари расмӣ вориди Ҷумҳурии Тоҷикистон шуд.
Маросими истиқболи расмии Сооронбой Жээнбеков дар назди Қасри миллат баргузор гардид.
Президенти Тоҷикистон Эмомалӣ Раҳмон Президенти Қирғизистон Сооронбой Жээнбековро истиқбол гирифта, ба болои шоҳсуфаи ифтихорӣ даъват кард.
Маросими истиқбол бо гузориши фармондеҳи Горди фахрӣ, садо додани сурудҳои миллии ду давлат, гузаштани сарони давлатҳо аз назди қатори сарбозон, арзи эҳтироми Сооронбой Жээнбеков ба Парчами давлатии Тоҷикистон, шиносоӣ бо ҳайатҳои расмии ду ҷониб ҷараён гирифта, бо гузашти низомии ҷузъу томҳои Горди фахрӣ аз назди сарони ду давлат анҷом ёфт.
Бино ба маълумотҳо аз расонаҳои қирғизӣ ва тоҷикӣ зимни сафар Сооронбой Жээнбеков бо президенти Тоҷикистон Эмомалӣ Раҳмон ва шахсони расмии воломақоми ҳукумати ҷумҳурӣ дидору гуфтушунид мекунад.
Дар ин дидору гуфтушунидҳо масоили ҳамкории дуҷонибаи кишварҳо дар бахшҳои иқтисоду тиҷорат, амният, энергетика, нақлиёт, амалисозии лоиҳаҳои минтақавӣ бар асоси дуҷониба ва дар доираи созмонҳои байнулмилалӣ, аз қабили СММ, САҲА, ИДМ, СҲШ ва СААД мавриди баррасӣ қарор хоҳанд гирифт.
Бино ба Акипресс, дар гуфтушунидҳо ба масъалаҳои анҷоми аломатгузорӣ ва тағйири марзи давлатии кишварҳо, ҷараёни амалисозии лоиҳаи CASA-1000, рушди ҳамкориҳои иқтисодӣ ва фарҳангиву гуманитарӣ, муборизаи муштарак бо ҷинояткорӣ таваҷҷуҳи хосса зоҳир хоҳад шуд.
Ин аввалин сафари президенти тозаинтихоби Қирғизистон ба Тоҷикистон аст.