Дар ин авохир масъулини ҳукуматӣ маъракаеро роҳандозӣ кардаанд, ки тибқи он тамоми ҷиноёти анҷомдодаи “Фронти халқӣ” ва табаддулотгарони давлатии соли 1992-ро мехоҳанд ба дӯши мухолифин бор кунанд. Бо истифода аз ВАО-и давлатӣ дурӯғпароканӣ мекунанд ва мехоҳанд аз боварии мардум сӯистифода кунанд.

“Паём” кӯшиш мекард аз зикри ҷиноёти “Фронти халқӣ” ва ҳукумати табаддулотгар камтар зикр кунад, то “коҳи кӯҳна бод” нашавад. Вале чун худи масъулини ҳукуматӣ ба ин кор оғоз кардаанд ва мехоҳанд тамоми ҷиноёти худро ба дӯши дигарон бор кунанд, мо ҳам тасми гирифтем ҷиноёти онҳоро нашр кунем.

Аз тамоми хонандагони “Паём” хоҳиш мешавад хотироти худро аз ҷиноёти “Фронти халқӣ” ва табаддулотгарон ба мо ирсол кунанд.

Инак хотираи кӯчаке аз табиб ва фаъоли маъруфи ҷомеъаи шаҳрвандӣ Абдулло Давлатов, ки солҳост дар Русия зиндагӣ мекунад:

Баъди маҷлиси «тақдирсозӣ» 16ум деҳаи мо тирборон шуд. Зархаридони хориҷие, ки гуё «сохтори конститутитсионӣ»ро барқарор мекарданд зодгоҳамро зери тасмаҳои оҳанини танкҳову зиреҳпӯшонашон ба дарёи хун табдил доданд.

Акаи Абдуманон, акаи Ҷамил, акаи Сайдамин, ки обчӣ буданд ва даҳҳои дигар, ки пашшае аз онҳо озор надида буд, аз деҳа берун нарафтанд. Гумон карданд, ки ба бегуноҳон кордор нахоҳанд шуд. Аксари ҳамдеҳагонам чунин гумон доштанд.

Аз ҷумла Аҳмад ҳам чунин гумон дошт. Дар 10 соли мактаби миёна ва 5 соли таҳсили донишгоҳ (факултаи мо 6 сола буд, аммо ӯ дорӯсозӣ хонда буд, ки 5 соли таҳсил дошт), боре надида будам, ки Аҳмад бо касе хархаша карда бошад: марде буд бо тамкин, сабур ва хеле содиқу одамдӯст!

Зархаридоне, ки масти пуштибонии хоҷагони хориҷияшон буданду теғи тоҷиккӯшашон тез буд, вориди деҳа шуданд ва ба қатли омм шуруъ карданд: Аҳмадро бо падараш акаи Раҳмат аз сари дастархон бурдунду дигар касе онҳоро надид…

46 нафарро бо сим дастонашонро пушташон бастанду болои «самосвали ЗИЛ» партофтанд ва бурданду аз руи кӯпрук ба дарё чаппа карданд. …одамони зиндаро ҳамчун хасу хошок аз руи самосвал чаппа карданд…

Акаи Ҷамил, мӯйсафеди нуроние буд, ки риши сафеди дароз дошт. Ба дасти қотилони «сохтори конститутсионӣ» уфтод.

Дастонашро бо сими алюминӣ бастанду ба хирмане, ки пахта хушк мекардем, бурданд. Чун мардҳои дар деҳа мондаро кушта буданду чанд кампире монда буд, ҳамин кампирҳоро ҳамчун «тамошобин» ҷамъ карданд…

Дастҳои акаи Ҷамилро бо сим дар пушташ бастанд ва ришашро …оташ заданд.

Риши тар месӯхт…

Акаи Ҷамил худро ба руи асфалти хирман партофту кушиш мекард оташи тарсӯзи ришашро хомӯш кунад…

Кампирҳои зинда монда нақл мекарданд, ки ҳатто болшевикони кофир ин қадар зулм накарда буданд!

Кампирҳои солхӯрда гуфтанд, ки маънии «фиғони осмонкафро» ҳамонҷо дарк карданд.

Фиғони осмонкаф суханбозӣ набудааст….