Вазири тандурустӣ ва ҳифзи иҷтимоии Тоҷикистон Ҷамолиддин Абдуллозода шумори бистариёни садамаи Кӯлобро эълон кард. Дар ҳамин ҳол шумори кушташудагон, ки ӯ эълон мекунад, аз он чи оморҳо манобеъи мо мегӯянд камтар аст.
Абдуллозода нишасти матбуотии ниҳоди зертобеъаш гуфт бар асари садама дар бемористони шаҳри Кӯлоб 12 нафар бистарӣ шуданд. ба гутфаи ӯ шаш нафар дар шӯъбаи умумӣ ва ҳамин миқдори дигар дар шуъбаи эҳёгарӣ қарор доранд.
Аз шаш нафаре, ки дар шуъбаи эҳёгарӣ бистариянд, вазир вазъи се тани онҳоро ниҳоят вазнин хонд ва гуфт, табибон натавонистанд ҷони ду нафарро наҷот диҳанд. Ба гуфтаи ӯ ҳоло дар ин шуъба 4 бемор бистариянд ва вазъи яке аз онҳо ниҳоят вазнин аст.
Вазири тандурустии кишвар шумори кушташудагонро даҳ нафар мегӯяд, дар ҳоле, ки ниҳоди зертобеъи ӯ — Беморхонаи шаҳри Кӯлоб рӯзи садама шумори кушташудагонро 10 нафар эълон карда буд. Вазир марги ду нафари дигарро эълон менамояд, аммо шумори ҷонбохтагонро аз 10 боло намебарад.
Тибқи иттилоъи бахши тоҷикии хабаргузории “Спутник” — расонаи русии наздик ба ҳукумати Тоҷикистон, ба ҳамаи онҳое, ки мошинҳояшон дар садама зарар дидааст, мошинҳои дигар аз навъи мошини худашон тақдим шудааст. Маълум нест ин мошинҳо аз ҳисоби буҷаи давлат тақдим шуда ва ё онро ширкати молики мошини боркаше, ки садамаро ба бор овард, паодохт шудааст.
Ин хабаргухорӣ ҳамчунин бо истинод ба мақомоти маҳаллӣ аз шурӯъи қарибулвуқӯъи бозсозии хонаҳои вайроншуда тибқи супориши раисҷумҳур хабар медиҳад. Дар ҳамин ҳол, манобеъи дигар мегӯянд ҳамаи онҳое, ки хонаҳояшон тахриб шудааст, дар хонаи хешу табор ва ҳамсояҳояшон ба сар мебаранд. Яъне мақомот барои зисти муваққатӣ ба онҳо кӯмаке накардаанд.