Нафари кушташуда дар назди меҳмонхонаи “Буюк Париж”-и Истамбул, ки қаблан Паём дар борааш хабар дода буд, сокини ноҳияи Шоҳмансури шаҳри Душанбе Фарҳод бо лақаби Японча ва қотилон тоҷикони дигар бо номҳои Бежан ва Сӯҳроб будаанд. Хархаша барои пуле рӯйдодааст, ки Бежану Сӯҳроб аз Фарҳод чун «доля» талаб кардаанд.
Чуноне, ки қаблан Паём иттилоъ дода буд, дирӯз дақиқан соати 14.19 назди даромадгоҳи меҳмонхонаи “Буюк Париж”, ки аксари тоҷирони тоҷик зимни сафар ба Истамбул онҷо қарор мегиранд,як шаҳрванди Тоҷикистон даст ба куштор тавассути силоҳи оташфишон зад..
Манбаъи “Паём”, ки ду навор аз ҷои ҳодиса фиристод, гуфта буд ҳам чинояткор ва ҳам нафари парондашуда тоҷик буданд. Аммо манбаъи дигар, ки ҳарду қотилро шахсан мешинохтааст, иттилоъ дод, ки нафари кушташуда шаҳрванди Ӯзбекистон буда, қотили ӯро паронда Сӯҳроб ном шаҳрванди Тоҷикистон аст.
Ба гуфтаи манбаъ, нафаре, ки ҳамроҳ бо Сӯҳроб қарор дошт Бежан Ёқубови 24 сола — набераи Сафаралӣ Кенҷаев буда, куштор низ бо фармони ӯ иҷро шудааст. Бежан ва Сӯҳроб дар содироти матоъ ба Тоҷикистон машғул буда, узви як гурӯҳи ҷиноии курдҳои Туркия будаанд.
Манбаъ мегӯяд Бежан Ёқубов дар кӯчаи Хоҷа Мустафо Пошои Истамбул хонаеро иҷора гирифта буд. Шаби гузашта Бежан ҳамроҳи нафаре бо номи Баҳодур зану фарзандашро аз хонааш гирифта, ба куҷое фирор мекунад. Ӯ дар Туркия ҳам бидуни ҳуҷҷат зиндагӣ мекард.
Хонаи Бежан, тибқи гуфтаи манбаъ, макони ҷамъшавии гурӯҳи ҷиноии курдҳо буда, ҳар шаб онҷо маводи мухаддир истеъмол мешудааст. Ду ҳафта қабл бародари Сӯҳроб дар Аксарайи Истамул ҳангоми фурӯши маводи мухаддир дастгир ба ба Тоҷикистон истирдод мешавад.
Модари Бежан духтари Сафаралӣ Кенҷаев Зарина буда, ҳафтае қабл писари Кенҷаев дар меҳмонии ӯ дар Истамбул қарор доштааст. Бежан қаблан як нафари дигар аз пояш паронда маҷрӯҳ карда буд.
Тибқи иттилоъи манбаъ, Сӯҳроб аллакай дастгир шудааст, аммо Бежан дар фирор қарор дорад.
Дар наворе, ки манбаъи Паём фиристода буд, дида мешавад, ки як нафар (Сӯҳроб) таппонча дар даст аз меҳмонхона берун мешавад ва бо он ба ду нафари дигаре, ки дар кӯча истодаанд наздик мешавад. Яке аз онҳо таппончаи дасти ӯро гирифтанӣ мешавад ва ду нафар ба ӯ дармеафтанд. Нафаре, ки бо ӯ қарор дошт (Бежан) ба задани ӯ оғоз мекунад. Баъди чанд сония оне, ки мекӯшид таппончаро аз дасти ҷинояткор гирад ба замин меафтад ва ҷинояткор таппонча дар даст фирор мекунад. Чеҳраи ҷинояткор дар навор дида мешавад. Ин навор тавассути дурбини назоратии мағозае сабт шудааст, ки дар ҳамсоягии меҳмонхона қарор дорад.
Дар навори дуввум, ки бо телефони дастӣ сабт шудааст, дида мешавад нафари тирхӯрда дар замин афтодааст ва атрофашро мардуми зиёд печонидаанд. Ӯ бо мушкилӣ ва оҳистагӣ сарашро меҷунбонад ва маълум аст, ки зинда мебошад. Онҷо як маъмури пулис ё муҳофизи низомипӯш ҳам дида мешавад.
Ин навор зоҳиран дарҳол баъди паронда шудани шаҳрванди Тоҷикистон гирифта шудааст.