Гурӯҳҳое аз физикдонҳои ядроии Амрико ин фарзияро матраҳ кардаанд, ки Русия дигар аслан на бомби атомӣ ва на кӯлоҳакҳои ҷангии атомӣ надорад. Ин фарзия бар пояи принсипи бисёр сода бунёд шудааст: агар дар тамоми имконоти илмӣ ва технологии худ Русия дар сатҳи кишварҳои ҷаҳони сеюм қарор дорад, имкон надорад, ки дар як самт бо пешрафтатарин кишварҳои ҷаҳон рақобат намояд.
Кишваре, ки ҳатто як смартфони оддӣ истеҳсол карда наметавонад, ба сохтан, нигоҳдорӣ кардан ва партоб кардани силоҳи ё кӯлоҳакҳои ҳастаӣ қодир нест
Ҳамчунин олимони амрикоӣ ба ин далел ҳам такя мекунанд, ки охирин бор Русия озмоиши силоҳи ҳастаиро дар 33 соли қабл, яъне соли 1989 ва дар замони Шӯравӣ анҷом додааст. Аз он ба пас на танҳо ҳеҷ озмоише ба вуқӯъ напайваста, балки интиқоли силоҳҳои ҳастаӣ аз як макон ба макони дигар низ ба қайд гирифта нашудааст.
Баъди азҳампошии Иттиҳоди ҷамоҳири Шӯравӣ, тамоми силоҳҳои ҳастаӣ дар пойгоҳҳои махсус дар шаҳрҳои низомӣ қуттибандӣ ва қуфл карда шуданд.
Таҳлилгари рус Виталий Дробишев менависад “бо дарназардошти ин ки аксарияти кулли мероси Шӯравӣ, аз ҷумла силоҳҳо ва дигар таҷҳизоти низомӣ дуздида ва фурӯхта шудаанд, ва ҳанӯз дар соли 1996 расонаҳои он ҳамон озоди Русия хабар дода буданд, ки танҳо худи бомбҳои ҳастаӣ боқӣ монда аммо тамоми техникаи мутааллиқ ба он аз ҷумла рокетҳо барои партоб ғорат гардидаанд, коршиносони амрикоӣ ба ин натиҷа расидаанд, ки Русия дигар қудрати партоби ин бомбҳоро надорад. Ин бомбҳо он қадар кӯҳнаву фарсуда шудаанд. ки метавонанд ҳатто ҳангоми интиқол битарканд”.
Ба гуфтаи ӯ, Амрико маҳз бо ҳамин сабаб баъди пошхӯрии Шӯравӣ ҳаргиз аз Русия нахостааст, ки аз силоҳи ҳастаӣ даст кашад.
Дар ҳамин ҳол, коршиноси рус мегӯяд дар солҳои навадуми асри гузашта дар Русия, мисли дигар кишварҳои собиқ Шӯравӣ ҳама таҷҳизоти низомӣ дуздида ва ба ҳайси оҳанпора фурӯхта шуда буданд. Ин назари коршиносонро вазъи имрӯзаи артиши Русия, ки маълум шуд тақрибан чизе барои ҷангидан надорад, тасдиқ мекунад. Қаблан расонаҳои давлатии Русия иддао мекарданд, ки силоҳҳои ин кишвар барои ҷангидан на танҳо бо Укроин, балки ними кишварҳои Аврупо низ кифоят мекунад.
Аммо ҳоло садҳо далел расонаӣ мешаванд, ки Русия сарбозонашро ба ҷанг бо мӯзаҳои солҳои 50-ум ва силоҳҳои молҳои ҳатто 40-ум мефиристад. Маълум шуд ҳамаи амборҳои стратегии Русия ё холӣ ва ё корношояманд. Як генерали рус ҳатто эълом кард аз як анбор ду миллион адад (!) либоси низомӣ ғайб задааст.
Ба ин суол, ки чаро Путине, ки ҳамеша ҷаҳонро аз силоҳҳои ҳастаии Русия метарсонад, боре ҳам озмоиши ин силоҳҳоро анҷом надодааст, коршиноси рус мегӯяд “барои он ки вазъи силоҳи ҳастаии Русия ҳамон гуна вахим аст, ки вазъи кайҳоннавардӣ, мошинсозӣ, тиб, соҳаи дифоъ ва ҳама соҳаҳои дигар. Арсенали атомии Русия мисли таърихи чандин бор бознависишудаи он афсона аст. Аз соли 1989 ин кишвар ҳеҷ озмоише аз силоҳи ҳастаӣ анҷом надода ва ҳатто интиқоли силоҳи ҳастаӣ аз як макон ба макони дигар иттифоқ наафтода ва ҳеҷ ихтиръи нав дар ин соҳаро нишон надодааст (Путин танҳо филмҳои тасвирии зебо намоиш медод). Ҳатто вақте дар соли 2014 дар филмҳои таблиғотӣ Путин дар бораи интиқоли силоҳи ҳастаӣ ба Крим қисса мекард, хадамоти ҷосусии Амрико филофосила онро рад кард”.
Ба гуфтаи муаллиф дастурамали Шӯравӣ талаб мекард, ки рокетҳои дорои кӯлоҳаки ҳастаӣ ё бомбҳои ҳастаӣ бояд ҳар 20 сол модернизатсия шаванд, аммо Русия дар 33 сол болре ҳам ин корро накард. “Бинобар ин бомбҳои атомӣ сода нобуд шуданд”.
Дробишев менависад “Путин хеле хуб медонад, ки дар сурати истифода аз силоҳи атомӣ билофосила ҷавоб хоҳад гирифт, ки ба ногузир маргаш мерасонад. Бинобар ин силоҳро метавон танҳо барои тарс додан истифода кард. Агар истифодаи он ғайримикон аст, пас чаро бояд барои нигоҳдориаш ҳар сол аз $12 то $25 млрд. кунад? Ба маротиб осонтару арзонтар аст, ки афсонаи вуҷуд доштани силоҳро созиву маблағҳои бузургро ба киса занӣ”.
Муаллиф менависад 8 моҳи охир Путин ба истерикаи ҳастаӣ гирифтор шудааст ва ҳамеша аз истифодаи силоҳи ҳастаӣ метарсонад. Дар ҳамин ҳол хадамоти ҷосусии ИМА, ки тамоми имконоташро барои таъқибу пайгирии силоҳҳои ҳастаии Русия сафрабар кардааст, ҳаррӯза иттилоърасонӣ мекунад, ки камтарин ишорае ба омодасозии силоҳи ҳастаӣ нест.
“Бояд махсус қайд кард, ки модернизатсияи силоҳи ҳастаи дар ССР соли 1982 қатъ шуд. Ҳизби коммунист худашро мутмаин сохт, ки бомбҳои дар ихтиёрашбуда барои пирӯзӣ дар ҷанги севуми ҷаҳон комилан басанда аст. Технологияи ҳастаии Русия 40 соли охир ҳеҷ пешравии надошт”.
Дар ҳамин ҳол “ИМА дар ин муддат триллионҳо доллар барои супоришҳои дифоъӣ ба ширкатҳои хай-текӣ мисли Boeing, Lockheed Martin, Raytheon, Boston Dynamics масраф карданд. Муқоисаи имконоти ҳастаии Русия бо ИМА муқоисаи мошинҳои ҳисоббарои шӯравии (ЭВМ) соли 1982 бо iPhone 14 аст, ки як моҳ қабл рӯнамоӣ шуд”.