Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) аз шаҳрвандони Тоҷикистон хост ному насаб ва ҷиноятҳои ҳамаи кормандони мақомоти қудратӣ ва интизомӣ, ки дар озору азият ва фишору шиканҷаи зиндониён, хонаводаҳои мухолифони сиёсӣ ва мардум бевосита ё бавосита даст доранд ба ин кумита хабар диҳанд.
КШНГЗС тасмим гирифтааст ному насаби онҳоро бо зикри ҷиноятҳояшон нашр кунад. Дар баёнияи ин кумита гуфта шудааст феҳрасте аллакай тартиб дода шудааст, вале кумита мехоҳад бо кғмаки мардум онро пурратар созад.
Матни баёнияи КШНГЗС ба шакли зер аст:
Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) рӯзҳои наздик феҳристи кормандони мақомоти қудратӣ ва интизомие, ки дар озору азият ва фишору шиканҷаи фаъолони ҷомеаи шаҳрвандӣ ва мардум даст доранд, эълон хоҳад кард.
КШНГЗС тасмим гирифтааст, дар ин феҳрист, ки бо кӯмаки ҳамкорон дар созмонҳои ҳомии ҳуқуқи башар ва зидди шиканҷа тартиб дода шудааст, ному насаби тамоми кормандони мақомоти қудратӣ ва интизомие, ки дар таъқибу фишор ва озору шиканҷаи шаҳрвандони Тоҷикистон бевосита ва ё бавосита дахил ҳастанд, нашр кунад.
Аммо бо таваҷҷӯҳ ба ин ки ҳанӯз дар ихтиёри КШНГЗС ва дигар созмонҳои ҳуқуқи башарӣ ва зидди шиканҷа, номи баъзе аз мақомоти қудратӣ ва интизомӣ, ки дар озору азият ва фишору шиканҷаи зиндониён ва хонаводаҳои мухолифони сиёсӣ ва мардум – бевосита ё бавосита — даст доранд вуҷуд надорад, аз ин рӯ КШНГЗС аз шаҳрвандони азизи кишварамон хоҳиш ба амал меоварад, дар сурати огоҳӣ ба ин мақомот аз ҷумла кормандони Кумитаи давлатии амнияти миллӣ, Вазорати корҳои дохилӣ, прокуратураҳо, судяҳо ва бахусус кормандони Сарраёсати иҷрои ҷазои ҷиноятии Вазорати адлия, ному насаби онҳоро ба мо бирасонанд.
Пешопеш ташаккуру сипоси худро бароятон иброз медорем.
Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС)
16.08.2019