“Сбербанк”-и Русия нақша дорад, ки барои хидмат ба мизоҷони мусулмон дар дохили бонкҳо равзанаҳои махсуси хидматрасонӣ боз кунад.
Дар ин бора, Олег Ғаниев намояндаи “Сбербанк” ба хабарнигорон маълумот додааст.
«Ин яке аз мақсадҳои гурӯҳи кории мо дар бонк аст. Имрӯз мо шоҳиди онем, ки аз ҳисоби мусалмонон муштариёни мо хеле зиёд шудааст. Аммо мусалмонон ба хотири ба талаботҳои исломӣ мутобиқ набудани системаи бонк, аз бисёр амалиётҳои бонкӣ парҳез мекунанд. Бинобар, мо дар бонкҳо равзанаҳои махсусеро ташкил мекунем, ки дар хидматрасонӣ талаботҳои исломӣ ба назар гирифта мешавад”. — гуфтааст Ғаниев.
Ҳамчунин мушовири муовини раиси Сбербанк Беҳном Қурбонзода гуфтааст, ки “Сбербанк” ин ягона бонке дар Русия нест, ки барои хидматрасонӣ ба мусалмонон равзанаи махсус дар бонкҳо боз мекунад. Ин гуна хидматрасонӣ дар ҷумҳуриҳои Бошқирдистон ва Тотористон низ вуҷуд доранд.
«Мо дар “Сбербанк” эҳсос намудем, ки талабот ба хидматрасонии системаи бонкии исломӣ дар ҳоли афзоиш аст. Хусусан дар шаҳрҳои Москва ва Санкт-Петербург сармоягузорон усулҳои бонкии ғайририбавиро ҷустуҷӯ мекунанд ва тоҷироне, ки барои тиҷорати худ сармоягузор меҷӯянд, сарсон мешаванд. Кушодани равзанаи махсуси ҷавобгӯ ба талаботи исломӣ аз як ҷониб агар мушкилоти мизоҷони мусалмонро бартараф кунад, аз ҷониби дигар гардиши сармоя тавассути “Сбербанк”-ро меафзояд, ки ин ба фоидаи мо низ мебошад” — таъкид кардааст Беҳном Қурбонзода.