Донишҷӯёни коллеҷ ё омӯзишгоҳи тиббии шаҳри Кӯлоб мегӯянд, ки моҳҳо боз шогирдонаи (стипендия) худро гирифта наметавонанд. Ҳадди ақалли стипендия дар Тоҷикистон 150 сомонӣ аст.
Масъулони омӯзишгоҳ пулҳои нагирифтаи шогирдонашонро тақрибан як миллион сомонӣ ҳисоб карданд, дар раёсати молияи вилояти Хатлон онро 600 ҳазор сомонӣ, муодили тақрибан шаст ҳазор доллар, баршумурданд.
Қарздории мақомот аз донишҷӯён дар ҳолест, ки ҳукумат қарор кард, аз якуми сентябр мизони шогирдонаро понздаҳ дарсади дигар афзоиш медиҳад, вале маълум нест, дар замони пандемияи коронавирус ва пур нашудани буҷа онро чӣ гуна пардохт хоҳад кард.
Ба иқрори худи масъулини колеҷ аз моҳи январ инҷониб натавонистаанд «ҳаққи» шогирдонро бидиҳанд. Номаҳо ба сохторҳои Вазорати молия беҷавоб мондаанд.
Дар раёсати молияи вилояти Хатлон ба Радиои Озодӣ гуфтанд, ба зудӣ бо донишҷӯёни омӯзишгоҳи тиббӣ ҳисобро баробар хоҳанд кард, аммо Ҳабибулло Раҳимов, сардори идораи молияи минтақаи Кӯлоб, гуфта, ки ҳалли масъала ба пур шудани буҷа вобастааст.
Мақомот моҳи феврали имсол айни чунин ваъдаро супурда буданд.
Се моҳ пеш донишҷӯёни коллеҷи омӯзгории шаҳри Кӯлоб низ аз мушкили дастрас нашудани ёрии давлат шикоят доштанд. Ҳоло мақомот мегӯянд, ин масъаларо ҳал кардаанд.
Ҳукумати Тоҷикистон эълон кард, ки аз якуми сентябр дар баробари нафақаву маоши кормандони соҳаҳои буҷавӣ шогирдонаи донишҷӯёнро низ понздаҳ дарсад афзоиш медиҳад. Мақомот мегӯянд, барои ин кор дар буҷа пули кофӣ доранд ва аз қабл тарҳашро кашида буданд, вале донишҷӯён мепурсанд, ки пас чаро дар пардохти пули онҳо таъхир шудааст.