Владимир Путин, раисҷумҳури Русия, сешанбе дар нишасти сарони кишварҳои БРИКС дар Африқои ҷанубӣ гуфтааст, ки қудрати хариди мардум дар кишварҳои БРИКС нисбат ба гурӯҳи ҳафт кишвари санъатӣ бештар аст.
Ӯ гуфт, ки талошашон барои ҳазфи доллар аз муомилоти тиҷории байналмилалӣ идома дорад.
Понздаҳумини иҷлоси кишварҳои гурӯҳи БРИКС дар Африқои ҷанубӣ бо ҳузури раҳбарони кишварҳои Бразилия, Русия, Ҳинд, Чин ва Африқои ҷанубӣ дар Йоҳаннесбург баргузор шуд.
Владимир Путин, раисҷумҳури Русия, ки ба иттиҳоми ҷиноёти ҷангӣ дар Укроин бар асоси ҳукми додгоҳи байналмилалии кайфарӣ таҳти пайгард аст, ба Африқои ҷанубӣ сафар накарда ва аз тариқи линки видеоӣ дар он ҷо суханронӣ кард.
Путин дар суханони сабтшуда дар ин нишаст, гуфт, ки сармоягузорӣ дар кишварҳои узви гурӯҳи БРИКС шаш баробар бештар шудааст.
Ӯ гуфт, ки иқтисоди ҷаҳон ба далели таҳримҳои якҷонибаи ғарбиҳо бисёр осеб дидааст. Путин аз “Бонки тавсеа”-и БРИКС ба унвони ҷойгузин барои ниҳодҳои мушобеҳи ғарбӣ монанди Бонки ҷаҳонӣ ёд кард.
Дар ин нишаст Путин ҳамчунон аз ҳамкорӣ бар мабнои усули “баробарӣ, ҳимоят аз мушорикат, эҳтиром ба манофеъи ҳамдигар” ёд кард ва гуфт “ин ҷавҳар масири ояндаи меҳварии ин гурӯҳ аст.”
Аъзои аслии гурӯҳи БРИКС шомили Бразилия, Русия, Ҳинд, Чин ва Африқои ҷанубӣ ҳастанд ва беш аз 40 дарсад ҷамъияти ҷаҳон дар ин кишварҳо зиндагӣ мекунанд.
Гуфта мешавад дар ин иҷлос дар мавриди узвияти беш аз 20 кишвар ба шумули Эрон низ баҳс шудааст. Пеш аз ин Африқои ҷанубӣ гуфта буд, ки 40 кишвар аз ҷумла Арабистон, хоҳони пайвастан ба гурӯҳи БРИКС ҳастанд.