Аввалин ҷаласаи алании шунидани шоҳидони таҳқиқоти муқаддамотӣ барои импичменти Доналд Трамп, раисҷумҳури Амрико рӯзи чаҳоршанбе дар сохтимони Кунгура дар Вашингтон оғоз шуд.
Аъзои демократи Маҷлиси намояндагони Иёлоти муттаҳида дар ҳоли анҷоми таҳқиқоти муқаддамотӣ барои импичменти Доналд Трамп ба далели суъистифода аз қудрат ҳастанд. Доналд Трамп дар ҷараёни аввалин муколимааш бо Владимир Зеленский, ҳамтои Украинии худ аз вай хоста буд то дар мавриди Ҷо Байден ва писараш таҳқиқ кунад.
Адам Шиф, раиси кумитаи иттилоотии Маҷлиси намояндагон дар суханоне дар аввалини ҷаласаи алании шунидани шоҳидон гуфт: “Оё раисҷумҳури Украинаро ба мудохила дар интихоботи мо даъват кардааст? Оё ӯ аз қудрати худ суъистифода кардааст? Мавзӯъ ба ҳамин содагӣ ва ваҳшатнокӣ аст.”
Раиси демократи кумитаи иттилоотии Маҷлиси намояндагон ваъда дод, ки таҳқиқот дар ин маврид бидуни “кинатӯзе” ва “то охир” анҷом хоҳад шуд. Дар муқобил Дуин Навноз, муовини кумитаи иттилоотии Маҷлиси намояндагон аз ҳизби ҷумҳурихоҳи раванди таҳқиқотро “корзори тӯҳмат ва ифтиро” хонд.
Уилям Тейлор, кордори сафорати Амрико дар Киев ва Ҷорҷ Кент, масъули олирутбаи вазорати хориҷаи Иёлоти муттаҳида ва коршиноси умури Украина дар ин вазоратхона аввалини шоҳидоне ҳастанд, ки ба таври аланӣ дар кумитаи таҳқиқи Маҷлиси намояндагон шаҳодат медиҳанд.
Доналд Трамп пеш аз оғози ҷаласаи шунидани шоҳидон дар сафҳаи твиттери худ эътибори ин ду шоҳидро зери савол бурд.
Уилям Тейлор дар суханони худ гуфт, ки аз назари Гордон Сондиленд, сафири Амрико дар иттиҳодияи Аврупо, Доналд Трамп дар робита бо Украина, бештар аз авзоъи дохилии ин кишвар алоқаманд ба оғози таҳқиқоти алайҳи Ҷо Байден будааст.
Уилям Тейлор ва Ҷорҷ Кент ҳар ду дар суханони худ таъкид карданд, ки ҷиҳатгирии сиёсӣ надоранд ва дар ҳар ду давлатҳои демократ ва ҷумҳурихоҳ фаъолият кардаанд.
То кунун се раисҷумҳури Амрико импичмент шудаанд аммо ҳеҷ кадом аз онҳо бо раъйи ду севуми аъзои Маҷлиси Сено аз кор барканор нашудаанд.
Дувумин ҷаласаи алании шунидани шоҳидони таҳқиқи муқаддамотӣ барои импичменти раисҷумҳури Амрико, қарор аст рӯзи ҷумъа баргузор шавад.