Ҷасади шаҳрванди Тоҷикистон Эҳсон Аминзодаро, ки дар қатли даҳҳо рус дар тамрингоҳи Белгород гумонбар аст, мақомоти Русия ба пайвандонаш додаанд. Дар ин бора Радиои Озодӣ иттилоъ медиҳад.
Наздикони Эҳсон Аминзода, ки дар Русия қарор доранд, гуфтаанд “ҷасадро ду рӯз пеш гирифтанд ва рӯзҳои наздик ба Тоҷикистон мефиристанд”.
Тибқи иттилоъи манбаъ. дар деҳаи Заргари ноҳияи Кушониён, зодгоҳи Эҳсон Аминзода, низ тасдиқ карданд, ки мунтазири расидани тобут ҳастанд.
Қаблан наздиконаш гуфта буданд, ки Эҳсон Аминзода ният дошт, кор кунаду бо духтари дӯстдоштааш оила барпо кунад, аммо рӯзи 10-уми октябр дар назди метрои Люблинои Маскав «гум шуд» ва хабари маргаш 16-уми октябр расид.
Ёдовар мешавем, ки 15-уми октябр расонаҳои Русия оид ба тирпарронӣ ва кушта шудани чандин нафар дар тамрингоҳи Белгород, ки онҷо нерӯҳои иловагиро барои сафарбарӣ ба ҷанги Украина омода мекарданд, хабар доданд.
Баъдтар гуфта шуд, ки Эҳсон Аминзода бо як ҳамроҳаш гуё дар заминаи эҳсосоти динӣ ба ҳамяроқони худ ҳамла карда, 11 нафарро куштанд ва 15 каси дигарро захмӣ карданд.
Пайвандони Эҳсон Аминзода пайваста таъкид мекунанд, ки ӯро иҷборан ба артиш ҷалб кардаанд. Мақомоти Тоҷикистон низ то ҳол дар ин маврид шарҳе ироа накардаанд.