Укроин хостори баргузории нишасти фавқулодаи Шӯрои амнияти Созмони милал дар бораи тасмими Владимир Путин бар истиқрори таслиҳоти ҳастаии тактикӣ дар Беларус шуд.
Вазорати умури хориҷаи Укроин бо интишори баёнияе тасмими Русия барои истиқрори силоҳҳои ҳастаии тактикӣ дар Беларусро “иқдоме таҳрикомез аз сӯи режими Владимир Путин, ки созишномаи манъи густариши силоҳҳои ҳастаӣ ва системи амнияти байналмилалиро тазъиф мекунад”, номид.
Дар ин баёния бо ишора ба ин ки чунин тасмиме ҷомеъаи байналмилалиро нигарон мекунад, омадааст: зеро Русия дар ҳоле, ки ба ҷанги таҳоҷумии худ алайҳи Укроин идома медиҳад, ин маворидро эълом мекунад.
Вазорати умури хориҷаи Укроин аз мардуми Беларус хост то аз таҳаққуқи тарҳи истиқрори таслиҳоти ҳастаии Путин ҷилавгирӣ кунанд ва аз кишварҳои узви Гурӯҳ-7 ва Иттиҳодияи Аврупо хост то дар сурати пазириши истиқрори силоҳҳои ҳастаӣ, ба давлати Беларус дар мавриди авоқиби он ҳушдор диҳанд.
Дар ин баёния зимни ишора ба ин ки Укроин интизор дорад иқдомоти муассире “алайҳ боҷхоҳии ҳастаи Кремл” аз Бритониё, Чин, Иёлоти муттаҳидаи Амрико ва Фаронса аз ҷумла аъзои доими Шӯрои амнияти Созмони милали муттаҳид анҷом шавад, омадааст: барои ин манзур, хостори ташкили ҷаласаи фавқулодаи Шӯрои амният ҳастем.
Гуфтанист Путин дирӯз бо ишора ба ин ки онҳо таслиҳоти ҳастаии тактикиро дар Беларус мустақар хоҳанд кард, гуфт: мо ин корро бидуни нақзи тааҳҳудоти байналмилалии худ анҷом хоҳем дод.
Вай эълом кард, ки Александр Лукашенко, раисҷумҳури Беларус пештар дархости истиқрори пойгоҳи таслиҳоти ҳастаии тактикиро дар кишвараш, ки ҳаммарзи Лаҳистон ба унвони узве аз НАТО аст, баён карда буд.