Мансабдори давлатӣ ва узви ҳизби Халқӣ демократии Тоҷикистон бо суистифода аз мансаб замини наздиҳавлигиро ба қиммати 40 ҳазор сомонӣ фурӯхтааст.

Тавре Агентии мубориза бо фасод иттилоъ медиҳад, Саидов Додаржон, ки дар вазифаи танзимгари Идораи давлатии беҳдошти замин дар ноҳияи Ҷалолиддини Балхӣ кор мекард, ба як сокини ноҳия замини наздиҳавлигӣ фурӯхтаст.

Манбаъ меафзояд, номбурда дар якҷоягӣ бо шаҳрванд Соҳибов Ашурбой, моҳи январи соли равон ба боварии шаҳрванд даромада, бо мақсади ба даст овардани молу мулки ғайр бо роҳи фиреб ва суистифодаи боварӣ аз ӯ 40 ҳазор сомонӣ талаб намуданд.

Мансабдори давлатиро кормандони агентӣ ҳини гирифтани 40 ҳазор сомонӣ аз шаҳрванд дар ҷойи ҳодиса дастгир намудаанд.

Дар иттилоия омадааст, ки «Маблағи мазкур аз ӯ ҳамчун далели шайъӣ гирифта шудааст ва  нисбати Саидов ва Соҳибов бо моддаи 247 қисми 4 банди «б» Кодекси ҷиноятии Тоҷикистон парвандаи ҷиноӣ оғоз гардида, тафтишот идома дорад.