Пулиси Белжик ба дафтари парлумони Аврупо ва дигар нуқоти юриш бурдааст то таҳқиқоти густурдае дар бораи фасоди марбут ба мизбонии Ҷоми ҷаҳонӣ дар Қатар анҷом диҳад. 

Дар бозрасӣ аз хонаҳо, дафтарҳо ва утоқҳои ҳотел, пулис ҳадди ақал 750 ҳазор евро пули нақд кашф ва забт кардааст ва то кунун чаҳор нафар ба фасод муттаҳам шудаанд. 

Ин таҳқиқот дар ҳоли ҳозир мунҷар ба дастгирии чандин нафар аз ҷумла муовини раисҷумҳур ва яке аз аъзои аршади парлумони Аврупо, шудааст ва ба назар мерасад боздоштҳои дигаре ҳам дар пай дошта бошад. 

Додситонҳо рӯзи душанбе гуфтанд то кунун 19 маҳалли сукунат ва дафтар, ба илова дафтарҳои парлумонии бисёреро, ки акнун таҳти муҳосираанд, бозрасӣ кардаанд. 

Полис 600 ҳазор евроро дар як хона кашф карда ва дар опортмони яке аз қонунгузорони Иттиҳодияи Аврупо 150 евро пули нақд кашф шудааст. 

Додситонҳо гуфтаанд ҳадаф аз ҳамалоти ахир забти таҷҳизоти фанноварии иттилоот аз коркунони парлумон будааст, то моликонашон натавонанд иттилоот онҳоро пок кунанд. 

Гуфта мешавад давлати Қатар мумкин аст ба умеди нуфуз дар парлумони Аврупо ба мақомҳои аршади аврупоӣ ришва дода бошад.

Роберто Метсола, раиси парлумони Аврупо дар пайи расвоии молии як намояндаи ин парлумон, бо баёни ин ки “демокросии аврупоӣ мавриди ҳамла қарор гирифтааст”, аз оғози “таҳқиқоти дохилӣ” дар парлумони Аврупо хабар дод. 

Ева Кайли, муовини раиси парлумони Аврупо ва яке аз мудофеъони саршиноси Қатар ва 3 нафари дигар рӯзи якшанбе 11 декабр дар чорчуби таҳқиқот дар мавриди пардохтҳои муҳими пулӣ, ки гуфта мешавад ради пойи Қатар, мизбони Ҷоми ҷаҳонии 2022 дар он дида мешавад, боздошт шуданд. 

Хонум Метсола рӯзи душанбе, ки бисёр мутаассир шуда буд, ин иттифоқро аз “бадтарин” рӯзҳои кории худ унвон кард. Бо ин ҳол ӯ гуфт, ки мутмаин аст, ки парлумони Аврупо аз ин буҳрон қавитар берун хоҳад омад. 

Раиси парлумони Аврупо дар идома гуфт: “ин афроди бадхоҳ, ки бо кишварҳои солиси худкома муртабит ҳастанд, зоҳиран аз созмонҳои ғайридавлатӣ, иттиҳодияҳо, афрод, мушовирон ва намояндагони парлумони Аврупо ба унвони силоҳе бо ҳадафи таҳти султа даровардани сиёсатгузории мо истифода кардаанд. Нақшаҳои бадхоҳонаи онҳо шикаст хӯрдааст.” 

Хонум Метсола дар идома ваъда дод, ки парлумони Аврупо як раванди ислоҳиро оғоз хоҳад кард то мушаххас шавад, ки “чӣ фарде ба имконоти ин ниҳод дастрасӣ дорад, созмонҳои ғайридавлатӣ ва афрод чи гуна таъмини молӣ мешаванд ва чӣ иртиботе бо кишварҳои солис доранд.” Ӯ ҳамчунин гуфт парлумони Аврупо шаффофияти бештар дар ҷаласот бо хориҷиҳоро дархост хоҳад кард. 

Раиси парлумони Аврупо ҳамчунин бо дархост барои муҳофизати беҳтар аз ифшогарони фасод, гуфт: “мо аз афроде, ки ба гузориши ҷурм кумак мекунанд, муҳофизат хоҳем кард ва ман системҳои гузоришдиҳии худро баррасӣ мекунам то бубинам чи гуна метавон онҳоро тақвият кард.”